कास्की र कञ्चनपुरका जुवाका खालमा दर्जन बढी जुवाडे

कास्कीमा आठ जना जुवाडे जुवाको खालबाट पक्राउ परेका छन् । पोखरा महानगरपालिका–१२, चापापानीमा जुवा खेलिरहेको अवस्थामा स्थानीय ५० वर्षीया पञ्च गुरुङसहित आठ जनालाई प्रहरीले नियन्त्रणमा लिएको छ । 

विशेष सुराकीको आधारमा जिल्ला प्रहरी कार्यालय कास्कीबाट खटिएको टोलीले उनीहरुलाई नियन्त्रणमा लिएको हो । जुवाडेको साथबाट एक लाख ३५ हजार ९८५ रुपैयाँ नगद र चार बुक तास बरामद गरेको छ । 

उता कञ्चनपुरमा पनि जुवा खेलिरहेको अवस्थामा प्रहरीले छ जना जुवाडेलाई समातेको छ । भीमदत्त नगरपालिका–३, जामिरगाडास्थित जंगलमा जुवा खेल्दै गरेको अवस्थामा स्थानीय ३३ वर्षीय भवानी सिंह बुढासहित छ जना पक्राउ परेका हुन् । 

वडा प्रहरी कार्यालय महेन्द्रनगरबाट खटिएको टोलीले उनीहरुलाई एक लाख ४२ हजार छ सय ४५ रुपैयाँ नगद र छ बुक ताससहित नियन्त्रणमा लिएको जनाएको छ । प्रहरीका अनुसार दुवै घटनाबारे थप अनुसन्धान भइरहेको छ ।