रवि लामिछानेले 'दाहिने हात'लाई मन्त्री बनाएपछि रास्वपाभित्र किचलो

प्रधानमन्त्री पुष्पकमल दाहाल 'प्रचण्ड' नेतृत्वको सरकारमा सहभागी भएसँगै राष्ट्रिय स्वतन्त्र पार्टीभित्र अन्तरविरोध शुरु भएको छ । 

पार्टी सभापति रवि लामिछानेले प्रत्यक्ष निर्वाचित सांसदहरुलाई पाखा लगाउँदै आफ्नो 'दाहिने हात' बनाएका डिपी अर्याललाई मन्त्री बनाएपछि प्रत्यक्ष निर्वाचित सांसदहरुले चित्त दुखाएका हुन् ।  समानुपातिक कोटाका उनी यसअघि श्रममन्त्री हुँदा म्यानपावर व्यवसायीहरुसँग मिलेको भन्दै चर्को आलोचना भएको थियो । 

रास्वपाबाट को-कोलाई मन्त्री बनाउने भन्ने विषयमा छलफल गर्न आज बिहान सचिवालय बैठक समेत बसेको थियो । बैठकमा ९० प्रतिशत पदाधिकारीले स्वर्णिम वाग्लेको नाम लिएका थिए । तर लामिछानेले अर्याललाई नै रोजेको बताइन्छ । त्यतिमात्रै होइन महामन्त्री मुकुल ढकालले समेत सचेतक निशा डाँगीलाई प्राथमिकतामा राखेका थिए । उनी पनि समानुपातिक नै हुन् । 

यही सन्दर्भमा महामन्त्री ढकाललाई जनआस्थाले 'अब्बल र जनताबाट निर्वाचित अन्य सांसदहरु हुँदाहुदै समानुपातिक कोटाबाट संसद छिरेकालाई मन्त्री बनाउनुको कारण के हो ?' भनेर सोधेको थियो । जवाफमा ढकालले पुरानो भाष्य परिवर्तन गर्न खोजिएको बताएका छन् । समानुपातिक कोटाबाट आएकालाई मन्त्री बनाउनै नहुने गरी कतै नलेखिएको उनको ठम्याई छ । 

'हामी पुराना दल एमाले,माओवादी र कांग्रेस जस्तो होइनौ,नयाँ पार्टी हौं', उनले भने, 'निर्वाचितलाई मात्र मन्त्री बनाउनु पर्छ भन्ने पुरानो भाष्यलाई परिवर्तन गर्न जरुरी छ ।' 

उपसभापति अर्यालले पार्टीलाई दिएको योगदानको मूल्यांकन गरेरै मन्त्रीको लागि अघि सारिएको ढकालले जानकारी दिए । रास्वपाको स्थापनादेखि आजसम्म आइपुग्दा अर्यालले पार्टीलाई ठूलो योगदान दिएको उनको दावी छ । 

उनले थप्दै भने, 'उपसभापतिज्यूले पार्टी स्थापनादेखि अहिलेसम्म दिएको योगदानलाई कदर गरेर अघि सारेका हौँ । एक वर्षअघि कसले पत्याएको थियो र रास्वपाले भाग लिएको पहिलो निर्वाचनमै १३ सिट जित्छ भनेर । त्यो उपलब्धी हासिल गर्न उपसभापतिज्यूले क्याम्पिङ गर्दै देशभरि हिँड्नुभएको छ । उहाँको त्यो दु:खको मूल्याकंन नै नगर्ने भन्ने त हुन्न होला नि !" 

त्यसो त,रास्वपाबाटै स्वर्णिम वाग्लेसहित सुमना श्रेष्ठ,हरि ढकाल, विराजभक्त श्रेष्ठ र सोभिता गौतमको नाम मन्त्रीको लागि चर्चामा छ । 'अरु को-कोलाई मन्त्री बनाउँदै हुनुहुन्छ ?' भन्ने जनआस्थाको प्रश्नमा महामन्त्री ढकालले अहिले निश्चित नभएको बताए । 

गठबन्धनमा मन्त्रालयको भागबण्डा टुंगाउन गठित कार्यदलले अन्तिम निष्कर्ष निकालेपछि मात्र रास्वपाले निर्णय गर्ने उनले बताए । उनले भने, 'मिडियाको चर्चामा आएका सबै साथीहरुको आ-आफ्नो पोर्टफोलियो छ । अहिलेलाई सभापतिज्यू र उपसभापति फिक्स हुनुहुन्छ । अरु कसलाई मन्त्री बनाउने, हामी छलफलमै छौँ । कार्यदलले भागबण्डाको टुंगो लगाएपछि मात्र कसलाई मन्त्री बनाउने निर्णय गछौँ ।'