उपनिर्वाचनको निम्ति मतदाता नामावली अद्यावधिक गरिँदै

आगामी वैशाख १५ गते हुन गइरहेको उपनिर्वाचनका निम्ति निर्वाचन आयोगले मतदाता नामावली अद्यावधिक तथा दावी विरोधको तालिकासूची सार्वजनिक गरेको छ । 

आयोगले यही फागुन २९ गतेदेखि चैत ५ गतेसम्म मतदाता नामावली अद्यावधिक (दाबी विरोधसहित) को कार्यक्रम सञ्चालन हुने जानकारी दिएको छ । 

उक्त अवधिमा मतदाता नामावलीमा भएको त्रुटी सच्याउन, कसैले झुटा विवरण दिई मतदाता नामावलीमा नाम समावेश गरेको भए सोको विरोधमा उजुरी दिन, दोहोरी नामावली भएको भए हटाउन सकिन्छ । 

त्यस्तै, एकाघर परिवारका सदस्यको मृत्यु भएको वा नागरिकता त्याग गरेको अवस्थामा नामावलीबाट नाम हटाउन निवेदन दिनेलगायतका विषयहरु कार्यक्रममा समावेश गरिएको छ । 

मतदाता नामावली अद्यावधिक कार्यका लागि आयोगको वेबसाइटमा गई अनलाइनमार्फत निवेदन दिन सकिनेछ । अन्तिम नामावली चैत २२ गते मतदाता प्रकाशन हुने छ । आयोगले २०८१ वैशाख १४ गतेसम्म १८ वर्ष उमेर पुग्ने मतदाताको विवरण अद्यावधिक गरिने समेत जनाएको छ । 

प्रतिनिधिसभाअन्तर्गत इलाम क्षेत्र नम्बर–२ र प्रदेशसभाअन्तर्गत बझाङ क्षेत्र नम्बर–१ मा रिक्त पदका निम्ति आयोगले आउँदो वैशाख १५ गते उपनिर्वाचन गराउँदै छ ।