नाम रविको,बटुल्ने काम केसीको

नागरिकताको नाम नन्दबहादुर क्षेत्री तर मलेसियामा नेत्र केसीको नामले चिनिने स्याङ्जा मूल घर भएका व्यक्तिमाथि मलेसियामा रवि (लामिछाने) पार्टीको संयोजक हुँ भन्दै नेपाली पीडित र सर्वसाधारणबीच धमाधम उठाइरहेको आरोप छ ।

सन् २००६ मा युरोप पठाउने भन्दै २० सर्वसाधारण नेपाली लिएर मलेसिया पुगेका केसीले तिनलाई त्यहीँ अलपत्र बनाए । ती सर्वसाधारण कता पुगे, तिनको हिसाब मिलाए कि मिलाएनन्- त्यो केसी नै जानुन्,तर राष्ट्रिय स्वतन्त्र पार्टीको आडमा उनले उठाइरहेकै देखिन्छन् ।

मार्चको पहिलो हप्तादेखि मलेसिया सरकारले अवैध देखिएका मानिस वा कामदारलाई सम्बन्धित देशको दूतावासले प्रमाणसहित आफ्नो नागरिक भएको करार गरिदिएपछि स्वदेश फर्काउने कार्यक्रम थालेको छ । त्यस वापतको लागत प्रति व्यक्ति पाँचसय रिंगिट मात्र हुन आउँछ।

तर उनै केसीको नेपाली राजदूतावासको भुईंतल्लामा एक भव्य रेष्टुरेन्ट छ र दूतावासमा आधिकारिकता पेश गर्न जाने अवैध नेपालीको मजबुरीको फाइदा उनी त्यहीँ बसेर उठाउँछन्। भन्छन् कि- नेपाल जाने हो भने मलाई तीनहजार रिंगिट दिनुस्,म सम्पूर्ण कुरा मिलाइदिन्छु।

नेपाली दूतावासले आफ्नै भुइँतल्लाबाट भैरहेको यस्तो कारोबारलाई सम्पूर्णत: नजरअन्दाज गरेको बताइन्छ ।

नेपालकी श्रीमती र परिवारलाई अलपत्र पारेर इन्डोनेसियन मूलकी मलेसियनसँग नजिकिएका केसीले, उनै महिलाको स्थानीय शक्ति प्रयोग गर्दै यस प्रकारले संस्थागत आम्दानी गरेको १० वर्ष बढी भैसक्यो, २००६ को सन्दर्भबाहेक पनि ।