क्यालेण्डर बनाएर गाडी दुर्घटना रोक्न माग

सत्तारुढ नेकपा माओवादी केन्द्रका सांसद सुदन किराँतीले सवारी दुर्घटना न्यूनीकरणका निम्ति क्यालेण्डर तयार गरेर काम गर्नुपर्ने बताएका छन् । 

आज प्रतिनिधि सभा बैठकको आकस्मिक समयमा बोल्दै निवर्तमान मन्त्रीसमेत रहेका उनले सो धारणा राखेका हुन् । सवारी दुर्घटना न्यूनीकरण गर्न किरातीले दीर्घकालीन रणनीति अपनाउन भौतिक पूर्वाधार तथा यातायात मन्त्रालयको ध्यानाकर्षण पनि गराए । 

त्यसका लागि क्यालेण्डर नै तयार गरेर काम गर्नुपर्ने उनको भनाई छ । ‘मर्ने मान्छे मरिहाल्छ, जहाँ घाइते भएको छ, एउटा परिवारमा एकजना मान्छे जीवनभरी घाइते हुँदाखेरी त्यसले राष्ट्रलाई कति धेरै क्षति पुग्नसक्छ ? यसमा हामीले ध्यान पुर्याउनुपर्छ', सांसद किरातीले भने, 'यातायात मन्त्रालयले दीर्घकालीन प्रकारको रणनीति निर्माण गरी दुर्घटना न्यूनीकरण निम्ति क्यालेण्डर तयार गरेर आजैबाट जानुपर्छ भन्नेकुरा म जोडदार माग गर्दछु ।’

हरेक दिन सवारी दुर्घटना हुँदा पनि त्यसतर्फ सरकारको ध्यान नगएको भन्दै उनले गुनासो पनि गरेका छन् ।