डोल्पाको आगो निभाउन खोज्दा घाइते दुई सैनिकको निधन

डोल्पाको ठूलोभेरी नगरपालिका–४, मस्तभवानी सामुदायिक वनमा हिजो लागेको डढेलो निभाउने क्रममा घाइते भएका दुई सैनिकको निधन भएको छ । 

डढेलो निभाउने क्रममा गम्भीर घाइते जंगलनजिकै देवीदत्त गुल्ममा कार्यरत सिपाही २८ वर्षीय हेमन्त रावत र २३ वर्षीय आसिफ बुढाको उपचारको क्रममा हिजो राति निधन भएको सैनिक प्रवक्ता कृष्णप्रसाद भण्डारीले जानकारी दिए । 

उनका अनुसार रावतको डोल्पा अस्पताल र आसिफको काठमाडौंस्थित कीर्तिपुर अस्पतालमा उपचारको क्रममा मृत्यु भएको हो । रावतको शवलाई प्रहरीको रोहबरमा आजै सैनिक हेलिकप्टरमार्फत डोल्पाबाट गृहजिल्ला जुम्ला लाने तयारी गरिएको डोल्पाका प्रमुख जिल्ला अधिकारी तुलसीप्रसाद दाहालले जानकारी दिए । 

उनका अनुसार घाइते अन्य दुई सैनिकको पनि अवस्था नाजुक छ । डोल्पाको सामुदायिक वनमा केही दिनयता खडेरी लागिरहेको थियो । 

खडेरीका कारण अस्ति पनि आगो लागेको थियो । बल्लतल्ल नियन्त्रणमा लिइएको आगो हिजो पुनः सल्किँदा निभाउन पुगेका चार जना सैनिक घाइते भएका थिए । 

तीमध्ये हेमन्त र आसिफको उपचारको क्रममा निधन भएको हो ।