तराईमा गर्मी बढ्दै, उच्च सतर्कता अपनाउन अनुरोध
राष्ट्रिय विपद् जोखिम न्यूनीकरण तथा व्यवस्थापन प्राधिकरणले तराईमा आगामी पाँच दिन तातो हावाको सम्भावना रहेको जनाउँदै उच्च सतर्कता अपनाउन अनुरोध गरेको छ ।
प्राधिकरणले आगामी शुक्रबारसम्म तराईका भू–भागहरुमा तातो हावा तथा लुको सम्भावना रहेकाले विशेषतः बालबालिकालाई उच्च सतर्कता अपनाउन भनेको छ ।
प्राधिकरणले घरबाट हिँड्दा साथमा पानीको बोतल बोक्न, कागती, नरिवल पानी तथा ताजा फलफूलको रस नियमित रुपमा सेवन गर्न सुझाएको छ । त्यस्तै, हल्का रंगको सुतीको कपडा लगाउन, टाउको ढाकी राख्न कपडा, टोपीको प्रयोग गर्न, पत्रु खाना नखान र ताजा फल, सलाद वा घरमै बनाएको खानेकुरा खान पनि आग्रह गरेको छ ।
बालबालिकालाई दिउँसो १२ बजेदेखि ४ बजेसम्मको कडा घाममा घरबाहिर सकेसम्म निस्कन नदिन, बिहान वा साँझको समयमा मात्र खेल्न दिन र रिंगटा, वान्ता, टाउको दुख्ने वा सास फेर्न अफ्ठ्यारो हुनेजस्ता समस्या भएमा तुरुन्त नजिकैको अस्पताल तथा स्वास्थ्य चौकी लैजान भनिएको छ ।
प्राधिकरणले पहाडी भू–भागका उपत्यका तथा खोँचहरुमा समेत तापक्रम क्रमिक रुपमा बढ्नसक्ने सम्भावना रहेकाले सतर्कता अपनाउन अनुरोध गरेको छ ।
टिप्पणीहरू