विदेश लैजाने नाममा दिल्ली पुर्याइएकी महिला वेश्यावृत्ति गर्न बाध्य

महिलालाई कुवेत लैजाने भन्दै पुर्याएर वेश्यावृत्तिमा लगाएका एक जना पुरुष पक्राउ परेका छन् । नेपाल प्रहरीको मानव बेचबिखन अनुसन्धान ब्युरोले दाङको बबई गाउँपालिका ५ घर भएका ४५ वर्षीय पूर्णबहादुर भण्डारीलाई नियन्त्रणमा लिएको छ ।

उनले एक महिलालाई कुवेत जान लाग्ने रकम आफैं व्यहोर्ने भन्दै प्रलोभनमा पारेका थिए । गत वर्षको जेठ ११ गते उनले महिलालाई स्वास्थ्य परीक्षणको लागि भन्दै एम्बुलेन्समा राखेर काठमाडौँबाट बुटवल पुर्याएको ब्युरोका सूचना अधिकारी गौतम मिश्रले जानकारी दिए । 

त्यसपछि भण्डारीले महिलालाई कुवेतको लागि भारतबाट प्रक्रिया थाल्न सजिलो हुने भन्दै दिल्ली पुर्याएका थिए । त्यहाँ पुगेपछि उनले महिलालाई एक फ्ल्याटमा बन्धक बनाएर वेश्यावृत्तिमा लगाएको ब्युरोले जनाएको छ । 

यो कार्यमा अन्य व्यक्तिहरुको पनि संग्लनता रहेको हुनसक्ने भन्दै ब्युरोले काठमाडौं जिल्ला अदालतबाट भण्डारीलाई पाँच दिन थुनामा राख्न अनुमति लिएर अनुसन्धान गरिरहेको छ ।