पाँच वर्षमा पूरा हुने भनिएको सुरुङ्गको काम दुई वर्षमा १२ प्रतिशत

पोखरा–सुनौली जोड्ने सिद्धार्थ राजमार्गको स्तरोन्नति सुस्त गतिमा अघि बढेको छ । निर्माण कम्पनीको उदासिनताका कारण 'मृत्युमार्ग'ले समेत परिचित उक्त राजमार्गको स्तरोन्नतिमा ढिलासुस्ती भएको हो । 

अहिले सिद्धबाबा क्षेत्रमा सुरुङ्गमार्ग खन्ने काम भइरहेको छ । पाल्पा–बुटवल सडकखण्डअन्तर्गत सिद्धबाबा क्षेत्रमा झर्ने चट्टानसहितको पहिरोले हरेक वर्ष ठूलो क्षति भोग्न परेपछि सरकारले सुरक्षित आवागमनका लागि सुरुङ्गमार्ग निर्माणको योजना बनाएको थियो । 

पाँच वर्षमा निर्माण सम्पन्न गर्नेगरी वि.सं. २०७८ फागुनमा चाइना स्टेट कन्स्ट्रक्सन इञ्जिनियरिङ कर्पोरेशनसँग सम्झौता गरिएको थियो । सम्झौताअनुसार २०८३ सालभित्र निर्माण सम्पन्न गरिसक्नुपर्नेछ । तर, ठेक्का सम्झौता भएको दुई वर्ष नाघिसक्दासमेत सुरुङ्गमार्ग निर्माणको काम बल्ल १२ प्रतिशत मात्रै पूरा भएको छ । 

अप्ठेरो र जोखिमयुक्त माथिल्लो सिद्धबाबा मन्दिरदेखि रामापिथेकस पार्कसम्म एक हजार १२६ मीटर सुरुङ्गमार्ग निर्माणको काम अघि बढेको छ । निर्माण कम्पनीले सुरुङ्गमार्गको डिजाइनमा एक वर्ष लगाउँदा काममा ढिलाइ भएको आयोजनाले जनाएको छ । 

मुख्य सुरुङ्गमार्ग दक्षिण पोर्टलबाट ४५ मीटर खनिएको छ । त्यस्तै, उत्तरी पोर्टलतर्फ स्लोप काटेर ढलान गर्ने काम भइरहेको छ । दक्षिण र उत्तरतर्फको दुवै पोर्टल, निकासका लागि तीन वटा सुरुङ्ग, स्लोप कटिङ, स्लोप प्रोटेक्सनलगायतका काम एकसाथ अघि बढेको आयोजनाले जानकारी दिएको छ । 

१५ दशमलव ६ मीटरको पहिलो बाइपास टनेल, सात मीटरको दोस्रो बाइपास टनेल र चार मीटरको तेस्रो बाइपास टनेल खन्ने काम सम्पन्न भइसकेको छ । आकस्मिक अवस्थाका लागि सुरुङ्गबाट बाहिरी सडक जोड्ने गरी तीन–तीन सय मीटरको दूरीमा तीनवटा सहायक सुरुङ्ग बनाइएको छ ।