नेपाल र कतारबीच ८ वटा समझदारी

नेपाल र कतारबीच द्विपक्षीय लगानी र सहकार्यसँग सम्बन्धित बिभिन्न ८ बुँदे समझदारी पत्रमा हस्ताक्षर भएको छ । 

प्रधानमन्त्री पुष्पकमल दाहाल प्रचण्ड र कतारी अमिर शेख तमिम बिन हमाद अल थानीबीच भेटवार्ता सम्पन्न भएलगत्तै समझदारी र सम्झौतामा हस्ताक्षर भएको हो । जसमा सरकारीस्तरमा ६ र निजि क्षेत्रका २ वटा सम्झौता भएका छन् ।  

दुई देशबीचका सरकारी समाचार एजेन्सी, महान्यायाधिवक्ता कार्यालयसम्बन्धी, कूटनीतिक तालिम र अध्ययन, शिक्षा, कला र संस्कृति, खेलकुद क्षेत्रमा सहकार्य गर्ने समझदारी भएको हो । प्रधानमन्त्री प्रचण्ड र कतारी अमिरको उपस्थितिमा नेपालको तर्फबाट कानून न्याय तथा संसदीय मामिला मन्त्री पदम गिरी र कतारका कानुन मन्त्रीले हस्ताक्षर गरेको जनाइएको छ । 

त्यस्तै, दुईदेशबीचका महान्यायाधिवक्ता कार्यालयसम्बन्धी, कूटनीतिक तालिम र अध्ययन, कतार चेम्बर अफ कमर्श र नेपाल उद्योग वाणिज्य महासंघबीच दुईटा सम्झौता भएका छन् ।

राष्ट्रपति रामचन्द्र पौडेलको निमन्त्रणामा दुईदिने राजकीय भ्रमणका लागि कतारी अमिर हिजो दिउँसो काठमाडौं आएका थिए । हिजै साँझ राष्ट्रपति पौडेलसँग शीतल निवासमा भेटवार्ता भएको थियो । 

राष्ट्रपतिले अमिरको सम्मानमा हिजो राति सोल्टी होटलमा राजकीय रात्रिभोजको आयोजना गर्नुभएको थियो । प्रधानमन्त्रीले कतारी राजाको सम्मानमा आज होटल द्वारिकाजमा दिवा भोजको आयोजना गर्दै हुनुहुन्छ । 

दिवाभोजपछि अमिर नेपाल भ्रमण सम्पन्न गरेर दिउँसो २ बजे स्वदेश फर्कने कार्यक्रम छ । राष्ट्रपति पौडेलले हिजो स्वागतमा झैँ आज पनि विमानस्थल पुगेर बिदाई गर्नुहुने छ ।