चितवनबाट फर्केलगत्तै प्रधानमन्त्री भेटघाटमा व्यस्त, पहिले गृहमन्त्री लगत्तै एमाले अध्यक्षसँग कुराकानी

प्रधानमन्त्री पुष्पकमल दाहाल प्रचण्ड, एमाले अध्यक्ष केपी शर्मा ओली र उपप्रधान तथा गृहमन्त्री रवि लामिछानेबीच भेटवार्ता भएको छ । उहाँहरुबीच सिंहदरबारस्थित प्रधानमन्त्री तथा मन्त्रिपरिषद्को कार्यालयमा पौने पाँच बजेदेखि कुराकानी भइरहेको छ ।

यसअघि झण्डै एक घण्टा प्रधानमन्त्री र गृहमन्त्री लामिछानेबीच कुराकानी भएको थियो । प्रधानमन्त्री चितवनबाट फर्केलगत्तै भेटवार्तामा सहभागी हुनुभएको हो । 

भोलि बोलाइएको संसदको संयुक्त बैठकमा राष्ट्रपति रामचन्द्र पौडेलले आगामी आर्थिक वर्षको नीति तथा कार्यक्रम प्रस्तुत गर्दै हुनुहुन्छ । तर, प्रमुख विपक्षी दल नेपाली काँग्रेसले भोलिको बैठक पनि अवरुद्ध पार्ने चेतावनी दिएपछि प्रधानमन्त्री आगामी रणनीति तय गर्न भेटघाटमा व्यस्त हुनुभएको हो । 

काँग्रेस सहकारी ठगी प्रकरणमा उपप्रधान तथा गृहमन्त्री लामिछाने मुछिएकाले संसदीय छानबिन समिति गठन नभएसम्म संसद बैठक सुचारु गर्न नदिने अडानमा छ ।