अमेरिकी वायुसेनाको विमानमा ल्याइएको सामानबारे सांसदको सोधनी

सत्तारुढ माओवादी केन्द्रका सांसद पूर्ण घर्तीले नेपालमा अमेरिकी एयर फोर्सको विमान बारम्बार आउनुको कारण माग गरेका छन् ।

प्रतिनिधि सभाको बैठकमा बोल्दै उनले गत वैशाखमा अमेरिकी एयर फोर्सका विमानमा के सामान ल्याइएको थियो ? भनेर सोधेका छन् ।

कमजोर नेतृत्वकै कारण यस्ता गतिविधिबाट नेपाल शक्तिशाली राष्ट्रहरुको चेपुवामा पर्दै गएको उनको तर्क थियो । 

उनले भनेका छन्, ‘गत वैशाख ६, ७, ८ र ९ गते अमेरिकी एयर फोर्सको पाँच वटा जहाज कतारबाट प्रत्येक साँझ आउने र बिहान फर्किने गरे । यसैगरी यही असार २ गते पनि मलेसियाबाट सोही एयर फोर्सको जहाज साँझ आएर बिहान फर्कियो ।’

सांसद घर्तीले ती जहाजमा ल्याइएका सामान कसका लागि थियो भनेर सोधनी गरेका छन् । ‘सामान्य हो भने प्राइभेट जहाज आउनुपर्ने, सैन्य सामग्री हो भने किन र के प्रयोजनका लागि ल्याइयो ?,’ उनको जिज्ञासा छ ।