लैंगिक तथा यौनिक अल्पसंख्यकहरुको रोपाइँ बौद्ध स्तुपामा (फोटो फिचर)

नेपालमा पहिलोपटक लैंगिक तथा यौनिक अल्पसंख्यक समुदायले राष्ट्रिय धान दिवस तथा ईन्द्रेणी रोपाइँ जात्रा मनाएका छन् । राजधानीको बौद्ध स्तुपा प्राङ्गणमा धान रोपेर हिजो उनीहरुले राष्ट्रिय धान दिवस मनाएका हुन् । 

मायाको पहिचान नेपालले डाकिनी हस्पिटालिटीको सहयोगमा आयोजना गरेको दिवसमा ठूलो संख्यामा उपस्थिति थियो । संस्थाका अध्यक्ष माया गुरुङ्गले रोपो दिएकी थिइन् भने केहीले रोपाइँ गरे, केहीले बाउसेको भूमिका निर्वाह गरेका थिए ।

माया पहिचानका कार्यकारी निर्देशक एवम् संविधान सभाका सभासद् सुनिलबाबु पन्तले धान दिवस तथा रोपाइँ जात्रा मनाउन पाउनु लैङ्गिक तथा यौनिक अल्पसङ्ख्यक समुदायका लागि सौभाग्यको कुरा भएको बताए । 

‘स्थानीय परम्परालाई निरन्तरता दिँदै संस्थाले धान दिवसको आयोजना गरेको थियो । पहिलोपटक लैङ्गिक तथा यौनिक अल्पसङ्ख्यक समुदाय धान दिवसमा सहभागी हुनुभएको थियो । यो उहाँहरुका लागि सौभाग्यको कुरा हो । लैङ्गिक तथा यौनिक अल्पसङ्ख्यक समुदाय समाजकै सदस्य हुन् । समाजमा उहाँहरुको पनि योगदान छ’, उनले भने । 

त्यस्तै, उनले आगामी वर्ष पनि यस्ता कार्यक्रमको आयोजना गरिने बताए । रोपाइँ जात्रा एउटा जीवन्त उत्सव हो । ‘मानो रोपेर मुरी उब्जाउने’ असार महिनाको १५ गते राष्ट्रिय धान दिवस मनाउने गरिन्छ । यो वर्षको नारा ‘जलवायुमैत्री कृषि, धान उत्पादनमा वृद्धि’ राखिएको थियो ।