‘भ्रष्टलाई छान्ने’ पार्टी भन्दै प्रचारप्रसार विभाग प्रमुखद्वारा रास्वपा परित्याग

राष्ट्रिय स्वतन्त्र पार्टी (रास्वपा) का प्रचारप्रसार विभाग प्रमुख सन्तोषकुमार दाहालले राजीनामा दिएका छन् । खोटाङ–काठमाडौं सम्पर्क विभागको सदस्यसमेत रहेका उनले साधारण सदस्यसमेत नरहनेगरी पार्टी परित्यागको घोषणा गरेका हुन् ।

‘जान्नेलाई छान्ने’ नाराबाट प्रभावित भएर सदस्यता लिएको उल्लेख गर्दै उनले पार्टीको व्यवहार भनाइविपरीत भएकाले राजीनामा दिन बाध्य भएको बताएका छन् । रास्वपा भ्रष्ट र ठगहरुलाई छान्ने पार्टी भएको उनको आरोप छ । 

‘राष्ट्रिय स्वतन्त्र पार्टीको ‘जान्नेलाई छान्ने’ भन्ने नाराबाट प्रभावित भएर यस पार्टीको सदस्यता लिएको थिएँ । पार्टीमा रही काम गर्ने क्रममा जान्नेलाई छान्ने भन्दा पनि व्यवहारमा चाँहि ‘आफ्ना,भ्रष्ट र ठगहरुलाई छान्ने’ रहेको स्पष्ट देखियो । त्यसकारण पार्टीका नाममा भ्रष्ट,ठग र कुनियत भएका अवसरवादी व्यक्तिहरुलाई समर्थन गरी काम गर्न नसक्ने भएकाले स्वःइच्छाले आजको मितिबाट राष्ट्रिय स्वतन्त्र पार्टीको साधारण सदस्यसमेत नरहनेगरी राजीनामा दिएको कुरा सम्पूर्णमा जानकारी गराउँदछु’,राजीनामा पत्रमा उल्लेख छ । 

पछिल्लो समय रास्वपामा नेता–कार्यकर्ताले पार्टी छोड्ने क्रम बढेको छ । केही महिनाअघि रास्वपाका प्युठान संयोजक सुमन सुवेदीले पार्टी छोडेका थिए । आसन र भाषणमा मात्रै रमाउन नसकिने भन्दै उनले पार्टी परित्याग गरेका हुन् । नेपाल प्रहरीको पूर्वडिआइजीसमेत रहेका नेता रमेश खरेललगायत दर्जनौं नेता–कार्यकर्ता पार्टीबाट बाहिरिइसकेका छन् ।