घुससहित पक्राउ परेकी लेखा अधिकृतविरुद्ध लाखौं नतिरेको अर्को आरोप

घुससहित पक्राउ परेकी चितवनको भरतपुरस्थित बीपी कोइराला मेमोरियल क्यान्सर अस्पतालमा कार्यरत लेखा अधिकृत अमृता कोइरालाविरुद्ध भ्रष्टाचार मुद्दा दायर भएको छ । अख्तियार दुरुपयोग अनुसन्धान आयोगले आज विशेष अदालत काठमाडौंमा उनीविरुद्ध मुद्दा दर्ता गरेको जनाएको छ । 

आयोगको हेटौंडाबाट खटिएको टोलीले गत साउन ६ गते उनलाई छ लाख रुपैयाँ घुससहित नियन्त्रणमा लिएको थियो । अनुसन्धानको क्रममा उनले विभिन्न बहाना बनाई गत आर्थिक वर्ष २०८०/०८१ मा अस्पतालमा औषधि सप्लाई गरेबापत नियमानुसार पाउनुपर्ने रकमको भुक्तानीका लागि सेवाग्राहीसँग घुस मागेको पुष्टि भएको अख्तियारको दाबी छ । 

कोइरालाले यसअघि पनि ती सेवाग्राहीसँग पटक पटक गरेर एक लाख चार हजार रुपैयाँ सापटीस्वरुप लिएकोमा दुई वर्षभन्दा बढी समय भइसक्दा समेत फिर्ता नगरेको पाइएको छ । अख्तियारले भ्रष्टाचार निवारण ऐन, २०५९ को दफा ५ बमोजिम सात लाख चार हजार रुपैयाँ बिगो कायम गरी कैद र जरिवानाको मागदाबीसहित मुद्दा दर्ता गरेको हो ।