भन्सारबाट माल गायब, नाकामा सुरक्षा थ्रेट

राजश्व अनुसन्धान विभागले बेला बेलामा त्रिभुवन अन्तर्राष्ट्रिय विमानस्थल भन्सार कार्यालयबाट जाँचपास भई छुटेका मालवाहक गाडी नियन्त्रणमा लिने गर्दै आएको छ । त्यसरी समातिएका गाडीहरु पुनः चेकजाँच गर्दा ठूलो मात्रामा राजश्व छल्ने गरिएको पाइएको छ ।

भन्सारका कर्मचारी, एजेण्ट र व्यापारीको सेटिङमा हुने गरेका यस्ता घटना त्यति धेरै नौलो होइन । यसैबीच अघिल्लो साता भन्सार परिसरबाट केही सामान सबैको आँखा छलेर जाँचपास नगरी निकासी भएको र पछि न्युरोडको खिचापोखरीमा फेला परेको स्रोतको दाबी छ । हाल अनुसन्धान चलिरहेको उक्त घटनामा संलग्न चार जना पक्राउ परेका छन् ।

गौचरस्थित भन्सार कार्यालयका अनुसार भन्सार एजेण्ट नम्बर ११६ का रामशरण पौडेलले चीनबाट आयातित १२ पोका सामान बा. १२१४ च ३८४९ नम्बरको पिकअप भ्यानमा राखेर बाहिर निकालेका थिए । भन्सार जाँचपास हुने क्रममा ११६ मध्ये १२ पोका एकाएक गायब भएपछि सोधखोज शुरु भएको हो । सिसिटिभी रेकर्डमा पौडेलले उक्त गाडीमा सामान लोड गरेको प्रष्टसँग देखिएको छ ।

सोही सिसिटिभी फुटेजका आधारमा भन्सार कार्यालयका उपसचिव मणिराम पौडेल नेतृत्वको चार सदस्यीय टोली गाडीको निगरानी गर्न खटियो । न्युरोडको खिचापोखरीस्थित गोदाममा सामान झारिसकेको अवस्थामा टोलीले फेला पारेको हो । भन्सार एजेण्ट, आयातकर्ता र उनका दुईजना कामदारसमेत चार जनालाई भन्सार प्रशासनले नियन्त्रणमा लिएको छ । 

पक्राउपछि केरकार गर्दा उनीहरुले झुक्किएर यस्तो हुन गएको बयान दिएको बताइएको छ । चारै जनालाई जनही १२ लाख धरौटीमा छोडेर पौडेल नेतृत्वको छानबिन समितिले अनुसन्धान जारी राखेको भन्सार कार्यालयले जानआस्थालाई बतायो ।   

यता, राजविराज, गौरलगायतका भन्सार कार्यालय प्रमुख तथा त्यहाँका कर्मचारीहरुले नाकामा तस्करबाट सुरक्षा थ्रेट भोग्नुपरेको विषय अर्थ मन्त्रालयसम्म पुगेको छ । गतसाता सम्पन्न भन्सार समीक्षा गोष्ठीका क्रममा सहभागीहरुले उक्त विषय उठाएको बुझिएको छ ।    

यस सम्बन्धमा जिज्ञासा राख्दा भन्सार विभागका महानिर्देशक हरिशरण पुडासैनीले सम्बन्धित जिल्लाका सिडिओ र प्रहरी प्रमुखसँग समन्वय भइरहेको जानकारी दिए । कर्मचारीलाई सुरक्षा अनुभूति कसरी दिलाउँदै हुनुहुन्छ ? भन्ने जनआस्थाको प्रश्नमा उनले भने, ‘जहाँ–जहाँबाट सुरक्षा थ्रेटको कुरा आयो सम्बन्धित जिल्लाका प्रमुख जिल्ला अधिकारी र प्रहरी प्रमुखसँग कुराकानी भएको छ । आपसी समन्वयमा सुरक्षाको बन्दोबस्त मिलाउनेतर्फ हामीले