विमानस्थलभित्र पिसाब फेर्ने बहानामा सुनको पोको हस्तान्तरण

संयुक्त अरब इमिरेट्सबाट काठमाडौं आएका एक जना यात्रुले आफूसँग रहेको सुन नयाँ दिल्लीबाट आएका अर्का यात्रुलाई विमानस्थलको शौचालयमा हस्तान्तरण गरेका छन् । अबुधाबीबाट एअर अरेबियाको उडान नम्बर ३ एल ००४३ मा हिजो दिउँसो पौने ४ बजे अवतरण भएको विमानका यात्रुले नयाँ दिल्लीबाट सोही समयमा आएका अर्का यात्रुलाई ४ बजेको समयमा सुन हस्तान्तरण गरेको बताइन्छ । 

त्रिभुवन अन्तर्राष्ट्रिय विमानस्थलस्थित अध्यागमन कार्यालय स्रोतका अनुसार एअर अरेबियाको उडानमा आएका राहदानी नम्बर यू८५१८६६० वाहक भारतीय नागरिक हरेश सेवलदास बिजलानीले आफूसँग रहेको १ किलो ६५ ग्राम सुन अर्का भारतीय नागरिकलाई विमानस्थलको आगमन कक्षको शौचालयमा सुन बुझाएका थिए । 

सोही समयमा नयाँ दिल्लीबाट आएको इण्डिगो एअरलाइन्सको उडान नम्बर ६इ११५५ का भारतीय भोटर आईडी नम्बर एमवाईडीई८७२२७२० का कमलेश रमेशलाल रोहरालाई उक्त परिमाणको अर्ध तरल अवस्थाको सुन दिइएको अनुसन्धानबाट खुलेको छ ।

नेपाल प्रहरी र भन्सारका कर्मचारीले सुन हस्तान्तरण गरेको अवस्थामा उनीहरुलाई नियन्त्रणमा लिएर आवश्यक चेकजाँच गरेको थियो । सोही क्रममा रोहराले बोकेको रातो रंगको ब्यागभित्र कालो प्लास्टिकले बेरिएको तीन वटा डल्ला सुन फेला परेको बताइन्छ । दुबैलाई आवश्यक अनुसन्धानको निम्ति राति ८ बजे महानगरी वृत्त गौशला पुर्याइएको हो ।