चिनियाँ पाहुना टोली बूढानीलकण्ठपछि खुमलटारमा

नेकपा माओवादी केन्द्रका अध्यक्ष पुष्पकमल दाहाल प्रचण्डसँग चिनियाँ कम्युनिष्ट पार्टीको छिङहाइ प्रान्तीय कमिटीका सचिव तथा केन्द्रीय सदस्य छन् काङ्गले शिष्टाचार भेटवार्ता गर्नुभएको छ । भेटमा नेपाल र चीनबीच भएका यसअघिका समझदारी कार्यान्वयन गर्नुपर्नेमा जोड दिँदै अध्यक्ष प्रचण्डले चीनको विकासबाट नेपालले धेरै सिक्न चाहेको बताउनुभएको छ ।

दाहाल निवास खुमलटारमा भएको भेटवार्तामा उहाँले नेपालको आन्तरिक राजनीतिमा केही उतारचढाव आए पनि आफ्नो पालामा दुई देशबीच भएका समझदारी कार्यान्वयन गर्न प्रतिबद्ध रहेको उहाँको सचिवालयले जनाएको छ । आफूहरुले गणतन्त्र स्थापनाका लागि थालेको जनयुद्धका बेलामा चिनियाँ कम्युनिष्ट पार्टीको इतिहास र माओत्सेतुङका रचनाहरुको धेरै अध्ययन गरेको उल्लेख गर्दै भन्नुभयो, ‘नेपाली विशेषतासहितको समाजवाद स्थापनाका लागि चिनियाँ समाजवादबाट धेरै कुरा सिक्न आफ्नो पार्टी इच्छुक छ ।’

प्रत्युत्तरमा सचिव काङ्गले दुई देशबीचको मित्रता थप बढाउनुपर्ने बताउँदै चीन नयाँ विकासको चरणमा रहेकाले नेपालले पनि चिनियाँ विकासको लाभ लिनसक्नेतर्फ सुझाउनुभयो ।

चीनको विकासको मुख्य कारण चिनियाँ कम्युनिष्ट पार्टी भएको उल्लेख गर्दै उहाँले आफ्नो पार्टीका जुनसुकै नेताले भ्रष्टाचार लगायतका गल्ती गर्दा कारवाही गरेकाले चिनियाँ जनताको विश्वास बढेको बताउनुभयो । भेटवार्तामा माओवादी केन्द्रका तर्फबाट वरिष्ठ उपाध्यक्ष नारायकणकाजी श्रेष्ठ, उपाध्यक्ष पम्फा भुसाल, उपमहासचिवद्वय जनार्दन शर्मा र शक्तिबहादुर बस्नेतलगायतको उपस्थिति थियो । 

चिनियाँ प्रतिनिधिमण्डलको तर्फबाट सचिव काङ, नेपालस्थित चिनियाँ राजदूत छन् सोङ्गलगायत प्रतिनिधिमण्डलका सदस्यहरुको उपस्थिति थियो । यसअघि उक्त टोलीले नेपाली काँग्रेसका सभापति तथा पूर्व प्रधानमन्त्री पुष्पकमल दाहाल प्रचण्डसँग पनि शिष्टाचार भेट गरेको थियो ।

टोली आज बिहान एअर चाइनाको उडान नम्बर सिए ४३७ मा सिचुआन प्रान्तको राजधानी छन्तुबाट काठमाडौं आइपुगेको हो । सचिव काङ र चिनियाँ प्रतिनिधिमण्डलका सदस्यहरुको सम्मानमा एमाले महासचिव शंकर पोखरेलले आज साँझ होटल द्वारिकामा रात्रिभोजको आयोजना गर्नुभएको छ । 

टोलीको भोलि बिहान पौने ९ बजे बालुवाटारमा प्रधानमन्त्री केपी शर्मा ओलीसँग भेटघाटको कार्यक्रम छ । त्यसपछि चिनियाँ पाहुनाहरु नजिकैको चिनियाँ दूतावास पुग्ने र दिउँसो साढे २ बजे होटल याक एण्ड यतिमा हुन लागेको सम्मेलनमा सहभागी हुने बताइएको छ । सचिव छन भोलि अपरान्ह साढे ४ बजे श्री जनकल्याण माध्यमिक विद्यालयमा आयोजित कार्यक्रममा सहभागी हुनुहुने छ ।

टोली भोलि नै साँझ साढे ५ बजे बत्तिसपुतलीस्थित बाजेको सेकुवामा डिनर खाएपछि ७ बजे काठमाडौं दरबार स्क्वायरको भ्रमणमा जाने छ । पर्सि बिहान स्वयम्भू अवलोकन भ्रमण, त्यसपछि भक्तपुर दरबार स्क्वायरको अवलोकनसँगै भक्तपुरमा नै लञ्चको कार्यक्रम छ । 

त्यहाँबाट सोझै त्रिभुवन अन्तर्राष्ट्रिय विमानस्थल पुगेर चिनियाँ टोली दिउँसो साढे १ बजे थाइ एअरवेजको उडान नम्बर टिजी ३२० मा बैंकक हुँदै स्वदेश फर्कने छ । पाहुना टोलीलाई नागपोखरीस्थित होटल मेरियटमा बस्ने प्रबन्ध मिलाइएको छ ।