मृगौला पीडितद्वारा सहयोगको याचना

दुबै मिर्गौला फेल भएर अस्पतालमा उपचाररत ललितपुरको महाङ्काल गाउँपालिका–२ मानिखेल निवासी बद्रीप्रसाद दुलालले सहयोगको याचना गरेका छन् ।

आर्थिक अभावका कारण उपचार हुन नसकेपछि उनले मनकारी दातासँग सहयोगको हात फैलाएका हुन् । उपचारको क्रममा सबै जायजेथा समेत बेचिसकिएको र थप उपचारका लागि रकमको अभाव भएकाले सहयोग गरिदिन पीडित परिवारले आग्रह गरेको छ । 

कृषि पेशामा निर्भर दुलाल एक वर्षदेखि पाटन अस्पतालमा उपचाररत छन् । उपचारका क्रममा हालसम्म लाखौं रकम खर्च भइसकेको उनले दु:खेसो गरे । गत असोजमा आएको बाढीले भएको घरखेतसमेत बगाएपछि अहिले चापागाउँमा भाडाको कटेजमा बसिरहेको उनी सुनाउँछन् । 

उनका दुई भाइ छोरामध्ये एक जना हालै वैदेशिक रोजगारीका लागि दुबई पलायन भएका छन् । घरमा कमाउने एक्ला दुलाल आफैं थला परेपछि जीविकोपार्जनमा समेत समस्या भइरहेको बताउँछन् । 

‘अहिलेसम्म आठ–नौ लाख रुपैयाँ उपचारमा सिध्धियो । अहिले डायलाइसिस गर्नसमेत पैसा छैन,’ उनले पीडा सुनाए । 

मिर्गौला फेल भएर डायलाइसिस गराइरहेकासहित गम्भीर प्रकृतिका रोग लागेका बिरामीलाई सरकारले मासिक पाँच हजार रुपैयाँ उपचार खर्च दिदैँ आएको छ । तर, गाउँपालिकाले उक्त रकम दिनसमेत आलटाल गरिरहेको उनको गुनासो छ । 

दुलालका अनुसार पालिकाले यसअघि उपचारका लागि एक लाख रुपैयाँ सिफारिस गरेको थियो । त्यसपछि भने डायलाइसिसको रकम दिन आनाकानी गरेको उनी सुनाउँछन् । 

‘यसअघि पालिका आफैंले एक लाख रुपैयाँ बराबरको उपचार सहयोग सिफारिस गरेको थियो । त्यो रकमसहित आफ्नो भएभरको जायजेथा बेचेर उपचार गर्दा पनि पुगेन । अहिले मासिक रुपमा डायलाइसिसबापत पाउनुपर्ने रकम पनि पाएको छैन,’ उनले भने ।

उनका अनुसार उपचारमा अझ ठूलो रकम खर्च हुने अस्पतालले बताएको छ । अहिलेसम्म जसोतसो आफूसँग भएको जायजेथा बेचेर उपचार गरिएपनि अब नसक्ने अवस्थामा पुगेको भन्दै उनले सहयोगका लागि आग्रह गरे । 

दुलालको नाममा रहेको लक्ष्मी सनराइज बैंकको खाता नम्बर ०८४०४६४०३२२०५००१ र यही खाताको क्युआर कोडमा आर्थिक सहयोग उपलब्ध गराउन पीडित परिवारले अनुरोध गरेको छ ।