हिमालतिर हिरोइन, दुई करोड आफ्नै हो कि ऋण ?

पछिल्लो समय नेपाली कलाकारहरुमा पनि हिमाल चढ्ने रहर जागेको छ । यसअघि निशा अधिकारीले सगरमाथा आरोहण गर्ने पहिलो नेपाली अभिनेत्रीको इतिहास बनाएकी छन् । त्यसपछि अभिनेत्री दिया पुनले पनि सगरमाथा चढिन् । 

यसरी सगरमाथा चढ्ने कलाकारको भीडमा अब मोडल तथा अभिनेत्री कविता नेपाली पनि थपिन लागेकी छन् । सगरमाथा आरोहणका लागि आधार शिविरमा तयारी गरिरहेको बताइन्छ ।

कविता चलचित्र ‘एक्लो’को छायांकन सकेर त्यता गएकी हुन् । धेरै म्युजिक भिडियोमा काम गरेकी उनलाई सगरमाथा आरोहणमा चलचित्रको निर्माण टिमले समेत सहयोग गर्ने बताएको छ । 

सामान्यतयाः सगरमाथा आरोहण पूरा गर्न कम्तीमा डेढ महिना लाग्छ । पूर्व तयारीका लागि पनि उत्तिकै समय लाग्ने पर्वतारोहीहरु बताउँछन् । यस हिसाबाले कविताले कम्तीमा तीन महिना बिताउनुपर्ने हुन्छ । 

सगरमाथा आरोहणमा ४० लाखदेखि दुई करोडसम्म खर्च लाग्छ । कविताले चलचित्र निर्माण टिमकै स्पोन्सरमा सगरमाथा चढ्न लागेकी हुन् वा व्यक्तिगत खर्चमा, त्यो भने खुलाइएको छैन ।