आगामी चुनावमा माओवादी पहिलो बन्ने प्रचण्डकाे दाबी

नेकपा माओवादी केन्द्रका अध्यक्ष पुष्पकमल दाहाल प्रचण्डले आगामी २०८४ मा हुने निर्वाचनबाट माओवादी पुनः पहिलो शक्तिमा स्थापित हुने बताउनुभएको छ ।

रुपन्देहीको तिलोत्तमामा आयोजित प्रशिक्षण कार्यक्रममा बोल्दै प्रचण्डले जहाँ गएपनि पछिल्लो समय माओवादीको पक्षमा नारा घन्किने गरेको उल्लेख गर्नुभयो । उहाँले विगतमा सरकारमा हुँदा गरिएको जनपक्षीय कार्यले पुनः शक्तिशाली राजनीतिक दल बन्ने विश्लेषण गर्नुभएको हो । 

उहाँले भन्नुभयो, ‘हालैको उप निर्वाचन परिणामले को सिद्धिँदैछ, को पुनस्र्थापित हुँदैछ भन्ने देखाएको छ ।’ विगतमा माओवादी केन्द्रको नेतृत्वमा भ्रष्टाचार विरुद्ध सुशासन अभियान, सामाजिक न्याय र राष्ट्रको हितमा छिमेकी देशहरुसँग विस्तार गरिएको सम्बन्धले जनतामा सकारात्मक छाप परेको प्रचण्डको निचोड छ ।

माओवादीप्रतिको जनताको अगाध विश्वास टुट्न नदिने वचनबद्धता जनाउनुभएको छ । कार्यक्रमम राष्ट्रिय जनमुक्ति पार्टीका महासचिव राम परियारसहित नेता कार्यकर्ताको ठूलो समूह माओवादी केन्द्रमा समाहित भएको थियो । कांग्रेस–एमाले परित्याग गरेकाहरु पनि माओवादीमा प्रवेश गरेको बताइन्छ ।