परराष्ट्रमन्त्रीलाई बेल्जियममा प्लेकार्ड देखाएको विषय पेचिलो बन्दै

उपमहासचिवले ‘भुटानी शरणार्थी काण्ड छानविन गर’ भन्दै विरोध गरेपछि महासचिवले ‘किन विरोध गरेको ?’ भन्दै आपत्ति जनाएकी छन् । नेदरल्याण्डको हेगबाट बेल्जियम पुग्नुभएकी परराष्ट्रमन्त्री डा. आरजु राणा देउवाको विरोध गर्दै प्लेकार्ड देखाइएको विषय निकै पेचिलो बन्दै गएको छ । बुधबार बेल्जियममा मन्त्री राणाविरुद्ध केही युवाहरुले नाराबाजी गरेका थिए । 

उनीहरुले ‘गिरिबन्धु, भुटानी शरणार्थी, टेरामक्स, वाइडबडी काण्डको छानबिन गर’, ‘लोकतन्त्र जिन्दावाद’ लगायतका नारा लेखिएका प्लेकार्ड बोकेका थिए । मन्त्री राणाविरुद्ध नाराबाजी गर्नेमा अरुसँगै गैर आवासीय नेपाली संघ बेल्जियम शाखाका उपमहासचिव राजेन्द्र कार्कीसमेत देखिएपछि नयाँ विवाद शुरु भएको छ । 

मन्त्री राणाविरुद्ध कार्की स्वयम् नाराबाजीमा उत्रिएको घटनापछि संघकी महासचिव रुविना शर्माले कारवाहीको माग गरेकी छन् । उनले संघको तर्फबाट विज्ञप्ति जारी गर्दै उपमहासचिव कार्कीको हर्कतप्रति खेद प्रकट गरेकी हुन् । 

विज्ञप्तिमा भनिएको छ, ‘परराष्ट्र मन्त्रालय गैर आवासीय नेपाली संघको अभिभावक मन्त्रालय रहेको तथ्यलाई ध्यानमा राख्दै, कसैको इशाराको प्रत्यक्ष निर्देशनमा उपमहासचिव कार्कीले संघको भावनालाई लत्याउँदै मन्त्रीविरुद्ध प्लेकार्ड प्रदर्शन गर्नु र राष्ट्रको इज्जत बोकेर आएकी मन्त्रीलाई विदेशी भूमीमा अपमान गर्नु एकदमै निन्दनीय कार्य हो ।’

मन्त्री राणाविरुद्धको प्रदर्शनले निजी व्यवसायलाई समेत असर गरेको संघको ठहर छ । थप भनिएको छ, ‘अनुमति बिना निजी व्यवसायमा बाधा पुर्याउने गरी नेपालीद्वारा सञ्चालित रेष्टुरेण्ट अगाडि गरिएको प्रदर्शनलाई अशोभनीय मान्दै भविष्यमा यस्ता घटनाहरुलाई रोक्न सबै सदस्य र सम्बद्ध पक्षलाई संयमित र जिम्मेवार रहन अनुरोध गर्दछौं ।’