प्रधानमन्त्रीको कटाक्ष- मान्छे खुवाएर बाघ पाल्न सकिंदैन !

प्रधानमन्त्री केपी शर्मा ओलीले मान्छे खुवाएर बाघ पाल्न नसकिने बताउनुभएको छ ।

काठमाडौँमा आज कोप २९ को समीक्षा कार्यक्रमलाई सम्बोधन गर्दै उहाँले वनको क्षमता हेरेर मात्रै बाघ पाल्नुपर्ने धारणा राख्नुभएको हो । नेपालको वनको क्षमताअनुसार १५० भन्दा बढी बाघ पाल्न नसकिने भएपनि अहिले ३ सय हाराहारीमा बाघ रहेको प्रधानमन्त्रीको दावी छ । 

अरुले भनेअनुसार बाघको संख्या अब बढाउन नसकिने पनि उहाँले प्रष्ट पार्नुभयो । मित्र राष्ट्रहरुलाई बाघ पाल्ने भए उपलब्ध गराउने बताउँदै ओलीले नेपालमा संख्या बढाउन नसकिने बताउनुभयो । 

प्रधानमन्त्री ओलीले नेपाललाई ३० प्रतिशत मात्रै जंगल भए पुग्ने उल्लेख गर्दै अरु देशका लागि जंगल संरक्षण नगर्ने पनि बताउनुभएको छ । ४७ प्रतिशत जंगल राखेको सम्मान र कदर नभए  ३० प्रतिशतमा झारेर बाँकी भूभागमा अन्न उब्जाएर खाने उहाँको भनाई छ ।  

यस्तो छ प्रधानमन्त्री ओलीको भनाई :

अरुले ३० प्रतिशत जंगल राख्छ, हामीले भोकै बसेर ४७ राख्या छौँ, रेस्पेक्ट हुनुपर्दैन हाम्रो कन्ससनेसप्रति । त्यसमा कन्बिन्सेसन दिनुपर्दैन । हामीले भनिदिनुपर्छ दुनियाँलाई होइन भने हामी पनि ३० प्रतिशत राख्छौँ । बाँकी धान, गहुँ फलाउँछौँ, मज्जाले खाएर बस्छौँ । हामीलाई ३० प्रतिशत जंगलले श्वास फेर्न पुग्छ, अरुले हाम्रो चिन्ता नगर्ने हामीले मात्रै अरुको चिन्ता गर्नुपर्ने ? भनिदिनुपर्छ । 

हामी २००९ मा कोपनेगेन कि कहाँ थियो बाघ सम्मेलन, त्यहाँ गयौँ । हामीसँग ११० वटा बाघ थिए । १० वर्षमा डबल गर्ने भन्यौँ । २०१९, २० तिर पुग्दा डबल बाघ चाहिन्थ्यो, २०१८ मा हामीसँग अढाइ सय भन्दा बढी बाघ भइसके । अहिले साढे ३ सय भन्दा बढी बाघ छन् । जंगलमा मात्रै होइन, गाउँमा हिँड्दा पनि बाघ छ कि भनेर हिँड्नुपर्छ । 

हामीले पनि चाहिने खालका काम गर्नुपर्छ । बाघ साढे तीन सय पाल्ने होइन, अलि थोरै पाल्नुपर्छ । डेढ सय बाघ भए पुग्छ । उपहार दिऔँ, हाम्रा मित्रहरुलाई । कोही बाज, कोही मयुर पालेका हुन्छन्, त्यस्ता जाबो चरा के पाल्नु, बाघ पाल्ने नि ढ्याप्प । विभिन्न देशलाई उपहार दिऔँ, खोरसमेतै दिनुपर्छ भनेनि दिऔँ । तर, जति भन्यो त्यति बाघ बढाउने भन्ने हुँदैन, कति लिमिट हो हाम्रो, हाम्रो वनको क्षमता त्यही अनुसार जानुपर्छ । 

मान्छे ख्वाएर बाघ पाल्न सकिँदैन । त्यो गल्ती गर्नु हुँदैन । मान्छे ख्वाएर बाघ पाल्ने ? अलिअलि खान्छ नि बाघ भएपछि भन्ने त्यस्तो हुँदैन । आफूलाई खायो भने के हुन्छ ? त्यो हेर्नुपर्यो नि ।’