विनोद चौधरीको श्रीलंकन पाहुना काठमाडौंमा नबस्ने

काँग्रेस सांसद तथा विवादास्पद व्यापारी विनोद चौधरीको निम्तोमा नेपाल आउन लागेका श्रीलंकन पूर्व राष्ट्रपति रनिल विक्रमासिंघे काठमाडौं ओर्लेर सोझै लुम्बिनी जाने भएका छन् । आज दिउँसो २ बजे त्रिभुवन अन्तर्राष्ट्रिय विमानस्थलमा आइपुग्ने उनी ४ बजे लुम्बिनी जाँदै छन् । लुम्बिनी जाने विमानबारे विस्तृत रुपमा केही बताइएको छैन ।

श्रीमतीसहित नेपाल आउन लागेका उनलाई होक्के होटलमा बस्ने प्रबन्ध मिलाइएको छ । आगामी बुधबार फर्कने उनको लुम्बिनी बाहेक अन्यत्रको भ्रमणबारे हालसम्म कुनै विवरण सार्वजनिक गरिएको छैन ।

श्रीलंकाका नवौं राष्ट्रपति रनिल र चौधरी व्यावसायिक साझेदार भएकाले उनको निम्तो मान्न यता आउन लागेको बुझिएको छ । चौधरीले श्रीलंकाका होटल,बैंक तथा वित्तीय संस्थामा लगानी गरेका छन् । त्यहाँको आर्थिक अवस्था कमजोर भएको मौका पारेर गत वर्ष चौधरीले सिंगापुरमा खोलिएको सिजी क्यापिटल पार्टनरको नाममा युनियन बैंकको ७१ प्रतिशत सेयर खरिद गरेका थिए ।

त्यसैगरी ताज समुन्द्र कोलम्बो होटलमा पनि लगानी छ । उनले तीलगायत विदेशका कुनै पनि आफ्नो लगानीबारे नेपालमा हालसम्म आधिकारिक रुपमा बताएका छैनन् । श्रीलंकाका पूर्व राष्ट्रपति रनिलले उनीसँग मिलेर धेरै लगानी गरेको बताइन्छ ।
Write to Editor & Uttam