श्रीलंकाका भूतपूर्व राष्ट्रपतिसँगै बालुवाटार पुगे विनोद चौधरी

प्रधानमन्त्री केपी शर्मा ओली र श्रीलंकाका भूतपूर्व राष्ट्रपति रनिल विक्रमासिंघेबीच भेटवार्ता भएको छ । प्रधानमन्त्री निवास, बालुवाटारमा भएको भेटमा विवादास्पद व्यापारी विनोद चौधरीसमेत सहभागी भएका हुन् ।

विक्रमासिंघे काँग्रेस सांसदसमेत रहेका चौधरीको निम्तोमा गत शनिबार श्रीमतीसहित नेपाल आएका हुन् । उनी सोही दिन अपरान्ह काठमाडौंबाट बुद्ध एअरको उडानमा भैरहवा हुँदै लुम्बिनी पुगेका थिए । 

उनको स्वागत र भ्रमणका लागि चौधरी त्योभन्दा केही दिनअघि नै नवलपरासीमा गएर बसेका थिए । लुम्बिनी पुगेको भोलिपल्ट चौधरीले श्रीलंकाली भूतपूर्व राष्ट्रपतिलाई हेलिकोप्टरमा राखेर कपिलवस्तुको तिलौराकोट र पूर्वी नवलपरासीमा आफैँले बनाएको सिजीधाम देखाउन लगेका थिए । चौधरीलाई श्रीलंकामा विक्रमासिंघेको व्यावसायिक साझेदार भन्ने गरिएको छ । 

नेपाल भ्रमण पूरा गरेर श्रीलंकाली भूतपूर्व राष्ट्रपति श्रीमती मैथ्री विक्रमासिंघेसहित आज स्वदेश फर्केका छन् । उनी श्रीलंकन एअरलाइन्सको उडान नम्बर युएल १८२ मा दिउँसो सवा २ बजे काठमाडौंबाट कोलम्बो प्रस्थान गरेका हुन् ।