घरमा भात खाँदै गरेका सहकारीका प्रबन्धकमाथि वडाध्यक्षद्वारा निर्घात कुटपिट

तनहुँको भिमाद बचत तथा ऋण सहकारी संस्थाका प्रबन्धक रामबाबु गैह्रेमाथि कुटपिट गरेको आरोपमा जनप्रतिनिधि पक्राउ परेका छन् । भिमाद नगरपालिका–७ का वडाध्यक्ष प्रकाश श्रेष्ठसहित पाँच जनालाई जिल्ला प्रहरी कार्यालय, तनहुँले नियन्त्रणमा लिएको छ ।

समातिएकामा वडाध्यक्ष श्रेष्ठ, स्थानीय ईश्वरकुमार श्रेष्ठ, नितेश श्रेष्ठ, नेपोलने श्रेष्ठ र विकल श्रेष्ठ हुन् । वडाध्यक्ष श्रेष्ठले २०७६ सालमा आफ्नी श्रीमती लक्ष्मीकुमारी श्रेष्ठको नाममा भएको जग्गा राखेर ऋण लिएका थिए । उक्त ऋण नतिरेपछि सहकारीले जग्गा लिलाम गरेको जनाइएको छ ।

२०७६ मा २८ लाख रुपैयाँ ऋण लिएकोमा हालसम्म एक पटक पनि ब्याज नतिरेका सहकारीका अध्यक्ष काजीमान श्रेष्ठले बताए । पटक पटक पत्र पठाउँदा र फोनमार्फत जानकारी गराउँदा पनि ऋण नतिरेपछि धितो लिलाम गरिएको उनले जानकारी दिए । 

भन्छन्,‘घरमा चिठी पठाउँदा नबुझ्ने, उल्टै कर्मचारीलाई धम्क्याएर पठाउने गरेपछि बाध्य भएर सञ्चालक समितिले कानुनी प्रक्रिया अगाडि बढाएको हो । सञ्चालक समितिले गरेको निर्णय प्रबन्धकले कार्यान्वयन गर्दा वडाध्यक्षले हातपात गरे ।’

अस्ति सोमबार बिहान घरमा खाना खाइरहेको अवस्थामा पाँच जनाको टोलीले कुटपिट गरेको प्रबन्धक गैह्रेले बताए । उक्त घटनापछि आफ्नो परिवारका सदस्यहरु त्रसित भएको उनको भनाइ छ ।