एउटा भारतीय कारमा चरेश र अफिम, अर्कोमा गाँजा

मकवानपुरमा दुई वटा भारतीय कारमा झण्डै २५ केजी चरेश र अफिम तथा एक क्विन्टल गाँजा फेला परेको छ । जिल्ला प्रहरी कार्यालय मकवानपुरले अफिम, चरेस र गाजासहित दुई वटा कार र तीन जनालाई नियन्त्रणमा लिएको छ । 

मध्यरातमा थाहा नगरपालिका–११ टिस्टुङ नौखनडेस्थित त्रिभुवनराजपथमा डिएल ८ सिएक्स १२२४ को भारतीय कारबाट २१ केजी चार सय ६० ग्राम चरेस, तीन केजी चार सय ७० ग्राम अफिम फेला परेको हो । चरेस र अफिमसिहत भारतीय राज्य हरियाणाको हिसार गोविन्दनगर बस्ने २५ वर्षीय कुनाल गोथ्वाल र २० वर्षीय मनिस कुमार पक्राउ परेका छन् । 

त्यसैगररी वीरगञ्ज जाँदै गरेको भारतीय नम्बर प्लेट डिएल १३ सी १५६१ को कारमा एक सय एक केजी गाँजा फेला परेको हो । हेटौँडा उपमहानगरपालिका–१५ रातोमाटे चेकपोस्टमा चितवनबाट वीरगञ्ज जाँदै गरेको कारमा रहेका  वीरगञ्जका २० वर्षीय राजन राउत कुर्मीलाई नियन्त्रणमा लिइएको प्रहरीले जनाएको छ ।