राजश्वको ढोकैमा जब तस्कर ढले

सरकारले विद्युतीय चुरोट अर्थात् भेप मेशिनको प्रयोग तथा आयातमा प्रतिबन्ध लगाएपछि पोल खोलाखोल हुँदा यही साता दुई ठूला तस्कर फन्दामा परेका छन् । जसमध्ये एक जना नाकाबाटै समाइए भने अर्काेको गोदाममै छापा मारिएको छ । 

तस्करीमा सक्रिय दिपेश चालिसेको समूहले रसुवा नाका हुँदै ९५ कार्टुन भेप भित्र्याउन खोज्दा २० दिनसम्म होल्ड भएपछि मुस्ताङ नाकाबाट छिरायो । रमेश शेर्पाको समूहले राजश्व अनुसन्धान विभागदलाई यो सूचना चुहाएपछि आइतबार ग १ ख ६९९९ नम्बरको मालवाहक गाडीलाई राजश्व अनुसन्धान विभागले नियन्त्रणमा लियो । १९ हजार भेप बरामद गर्‍यो ।

भोलिपल्ट अर्थात् अस्ति सोमबार चालिसेको तर्फबाट एक व्यवसायी बयान दिन पुल्चोकस्थित राजश्व अनुसन्धान विभागमा जाँदा गेटैमा बेहोस भएर ढले र तत्कालै अस्पताल लानुपर्‍यो । अहिले यो समूहको घ्याचे गुरुङ्गे, आङ्गे गुरुङ्ग, बिष्णु थापा पक्राउ परेका छन् ।

दुई दिनपछि मंगलबार चालिसे समूहकै सूचनाका आधारमा राजश्वले अर्काे गोदाममा छापा मार्‍यो र इमाडोलबाट १ लाखभन्दा बढी भेप बरामद गरेको छ । उक्त भेप सिल्क ट्रान्सपोर्टका सञ्चालक रमेश शेर्पा समूहको रहेको बुझिएको छ । प्रति थान पाँच डलर पर्ने भए पनि उक्त गोदाममा रहेको भेप डेट एक्सपायर भइसकेको थियो । शेर्पाको समूहले तीन डलरमा बेच्न खोज्दा पनि सकेको थिएन ।

भेपको न्यूनतम मूल्य पाँच डलर राखेर त्यसमा भन्सार महसुल ४० प्रतिशत, थप भन्सार महसुल २०, अन्तशुल्क ४० र १३ प्रतिशत मूल्य अभिवृद्धि कर जोड्दा झण्डै प्रति पिस १७ सय ४० पर्ने देखिन्छ । यसरी एक लाख पिसको मूल्य झण्डै १७ करोड ४० लाख बढी पर्न आउँछन् । शेर्पालाई कांग्रेस नेता मोहन बस्नेतको आड र भरोसा रहेको उनी निकट व्यवसायीले बताए ।

गोदाममा छापा मारिएसँगै शेर्पा भने फरार भएका छन् । उनको समूहका दुई जनालाई प्रहरी नियन्त्रणमा लिएको राजश्व अनुसन्धान विभागले जनाएको छ । भेपको तस्करी कुन रूपमा बढ्दैछ भन्ने एउटा उदाहरण मात्र हो, हप्ता दिनमै १ लाख १९ हजार थान बरामद हुनु । यसअघि पथलैयाबाट १५ हजार र बुटवलबाट ४ हजार थान भेप बरामद गरिएको थियो ।

उसो त नेपालमा भेपमाथि प्रतिवन्ध लगाउनुअगाडि दुई आर्थिक वर्षमा मात्र ३९ लाख थान वैध च्यानलबाट भित्रिएको थियो । अघिल्लो आर्थिक वर्ष ४ लाख हाराहारी थान भेप भित्रिएकोमा गत आर्थिक वर्ष ३५ लाख बढी भित्रिएको भन्सार विभागले जनाएको छ ।