‘साहित्य समाजको दर्पण’

समाजलाई सही दिशातर्फ डोर्याउन साहित्यको भूमिका महत्वपूर्ण रहने कृषि तथा पशुपन्छी विकासमन्त्री रामनाथ अधिकारीले बताएका छन् । 

धादिङको सदरमुकाम धादिङबेसीमा आयोजित बागमती साहित्य महोत्सव उद्घाटन समारोहलाई सम्बोधन गर्दै मन्त्री अधिकारीले साहित्य समाजको चनाखो आँखा रहेको पनि उल्लेख गरे । ‘साहित्य समाजको आँखा हो । साहित्यले जीवन र जगतलाई विवेक दिन्छ’, मन्त्रीले भने, ‘साहित्य नै जीवनको कलात्कम अभिव्यक्ति हो । समाजलाई सही दिशातर्फ डोर्याउने दृष्टिकोण दिन्छ ।’ 

समाजमा देखापर्ने घटनालाई समेटेर अभिव्यक्त गर्ने माध्यम नै साहित्य रहेकाले सभ्य समाज निर्माणमा साहित्यको भूमिका महत्वपूर्ण भएको उनले बताए । 

‘साहित्य समाजको दर्पण हो । साहित्यले समाजका विकृति र विसंगतिलाई शब्दमा समेटेर जनमानससमक्ष पुर्याउने काम गर्छ । साहित्यले समाजलाई खबरदारी गराउँछ । त्यही साहित्यमा लागेपछि समाजलाई राम्ररी निहालेर हेर्न पाइन्छ’, मन्त्री अधिकारीले भने ।