क्रान्तिका लागि तयार रहन अपिल गरेका लामिछाने उच्च अदालतमा

सहकारी ठगी प्रकरणमा आधा दर्जन जिल्लामा मुद्दा खेपिरहेका राष्ट्रिय स्वतन्त्र पार्टी (रास्वपा)का सभापति रवि लामिछानेले उच्च अदालत पाटनमा पुनरावेदन गरेका छन् । धरौटीमा छोड्ने काठमाडौं जिल्ला अदालतको यसअघिको आदेशविरुद्ध उनले उच्च अदालतमा आज निवेदन दर्ता गराएका हुन् । 

कालिमाटीको स्वर्णलक्ष्मी सहकारीको बचत अपचलन सम्बन्धि मुद्दामा गत माघ ३ गते जिल्ला अदालतले लामिछानेलाई ‘अहिले नै निर्दोष हुन् भन्ने अवस्था नदेखिएको’ जनाउँदै ६० लाख रुपैयाँ धरौटी लिएर थुनामुक्त गर्ने आदेश दिएको थियो ।

उक्त आदेश चित्त नबुझेको र त्यो बदरको माग गरिपाउँ भनी उच्च पुगेका उनले साधारण तारेखमा मुद्दा पुर्पक्ष गर्न पाउनुपर्ने जिकिर गरेका छन् । कास्की र रुपन्देही जिल्ला अदालतको आदेशविरुद्ध लामिछाने यसअघि नै पुनरावेदनमा गइसकेका छन् । 

अब चितवनको सहारा सहकारी ठगीसम्बन्धी मुद्दामा जिल्ला अदालतले गरेको ५४ लाख रुपैयाँ धरौटीमा थुनामुक्त गर्ने आदेशविरुद्ध मात्र उनी उच्चमा जान बाँकी छ । पर्साको सानो पाइला सहकारीको बचत हिनामिनामा मुछिएका उनीमाथि अनुसन्धान सम्पन्न भएपनि अहिलेसम्म मुद्दा दर्ता भएको छैन ।

सहकारी ठगीको यति ठूलो मुद्दा झेलिरहेका र पछिल्लो समय मौन रहेका लामिछानेले सरकारविरुद्ध कडा धारणा राखेका छन् । उच्चमा पुनरावेदन पश्चात पत्रकारसँग कुरा गर्दै उनले अहिले बोल्ने बेला नआएको तर आफू बोलेपछि दुई तिहाइको सरकारको बोलि बन्द हुने जिकिर गरे । 

राजावादी आन्दोलनबारे मौन रहँदै आएका लामिछानेले क्रान्तिका लागि तयार रहन अपिलसमेत गरेका छन् ।