‘जनविद्रोह’ गर्छु भन्दै दिल्ली गएका दुर्गा प्रसाईं जीब्रो जँचाएर फिर्ता

अस्ति दिउँसो काठमाडौंबाट नयाँ दिल्ली पुगेका राष्ट्र,राष्ट्रियता, धर्म,संस्कृति तथा नागरिक बचाउ महाअभियानका संयोजक दुर्गा प्रसाईं फर्केका छन् । उनी नेपाल वायुसेवाको उडान नम्बर आरए २१८ मा साँझ सवा ७ बजे काठमाडौं आइपुगेको बुझिएको छ । 

उनी अस्ति दिउँसो इण्डिगो एअरलाइन्सको उडानबाट त्यता गएका थिए । उता जानुअघि प्रसाईंले चैत १५ गतेदेखि राजा र राजसंस्थाको पक्षमा गणतन्त्रविरुध्द जनविद्रोह गरिने चेतावनी दिएका उनले देश जोगाउने अभियान भन्दै काठमाडौंको तीनकुनेमा १५ गते  हुने विद्रोहमा भाग लिन समर्थकहरुलाई आग्रह गरेका छन् । त्यही दिन समाजवादी मोर्चाले रत्नपार्क र भृकुटीमण्डप क्षेत्रमा गणतन्त्र जोगाउने प्रदर्शन गर्दैछ ।

प्रसाईंले बैंक तथा वित्तीय संस्था र विशेषगरी लघुवित्त वित्तीय संस्थाबाट कर्जा लिएकाहरुलाई ऋणको साँवा तथा ब्याज नतिर्न आह्वान गर्दै आएका छन् । विशेषगरी त्यस्तो कर्जा लिएकाहरुले नै प्रसाईंको आह्वानमा हुने गरेका कार्यक्रममा भाग लिने गरेका छन् ।

उनी आफैले भने आठ वटा बैंक तथा वित्तीय संस्थाहरुलाई कर्जाको साँवा र ब्याज गरेर झण्डै सात अर्ब रुपैयाँ तिर्न बाँकी छ । बि एण्ड सी मेडिकल कलेज तथा पूर्वाञ्चल क्यान्सर अस्पतालमा मात्रै ब्याज बाहेक बैंकहरुको करिब ६ अर्ब कर्जा रहेको राष्ट्र बैंक स्रोतको दाबी छ ।