सडकमा 'बालेन चोर देश छोडको नारा', तत्काल पक्राउ गर्न युवा संघको माग

सामाजिक सञ्जालका 'हिरो' काठमाडौँ महानगरका मेयर बालेन्द्र उर्फ बालेन साहविरुद्ध सडकमा नारा लागेको छ । 

कवाड व्यवसायी संघर्ष समितिले आज काठमाडौँमा आयोजना गरेको विरोध प्रदर्शनमा 'बालेन चोर देश छोड' को नारा लागेको हो । काठमाडौँ महानगरले खोसेको सामान फिर्ताको माग गर्दै व्यवसायीहरु दिउँसो सडकमा ओर्लिएका थिए । 

कवाडी व्यवसायी संघर्ष समितिका संयोजक राम केबल गुप्ताको नेतृत्वमा काठमाडौं-१२ स्थित वातावरण व्यवस्था विभागको कार्यालयअगाडि भेला भएका उनीहरुले महानगरले जफत गरेको समान र साईकल तत्काल फिर्ता नगरे थप संघर्ष अघि बढाउने चेतावनी पनि दिएका छन् । त्यसक्रममा 'राजु पाण्डे मूर्दावाद', 'लुटिएको सामान फिर्ता गर', 'काठमाडौं महानगरको ज्यादती बन्द गर', को नारा पनि लागेको थियो ।

यता, सरकारको विरोध गर्दै टुकुचामा मान्छे गाड्ने चेतावनी दिएका बालेनलाई तत्काल पक्राउ गरी कानुनी कारवाही गर्नुपर्ने माग उठेको छ । सरकारको नेतृत्व गरिरहेको नेकपा एमालेको भातृ संस्था युवासंघ नेपाल, काठमाडौँ महानगर कमिटीले त्यस्तो माग राखेको हो । 

बालेन्द्रले हिजो साँझपख फेसबुकमा स्टाटस लेख्दै सरकारको दम्भका कारण महानगरका सफाई कर्मचारीले तलव नपाएको भन्दै आक्रोश पोखेका थिए । एक हप्ताभित्रमा तलव नपाए सबैलाई टुकुचामा गाड्ने उनको चर्को धम्कि थियो ।

मदिराको सनकमा बालेन्द्रले यस्तो अभिव्यक्ति दिएको भन्दै एमालेका युवाले समाजलाई नभड्काउन सचेतसमेत गराएका छन् । यस्ता आपत्तिजनक अभिव्यक्ति दिने मेयरलाई अबिलम्ब कानुनी कठघरामा उभ्याउन युवासंघले जोडदार माग गरेको माग गरेको छ ।