काँग्रेसको अपाङ्ग संघमा कलह, गगनविरुद्ध कोइराला गुट अदालत जाने

नेपाली कांग्रेसको भ्रातृसंस्था राष्ट्रिय लोकतान्त्रिक अपाङ्ग संघको नयाँ नेतृत्व चयनमा पार्टी सभापति शेरबहादुर देउवा र महामन्त्री गगन थापाको हस्तक्षपपछि किचलो निम्तिएको छ । चुनावमा धाँदली भएको भन्दै दुई पक्ष आमने-सामने भएपछि लफडा निम्तिएको हो । 

पार्टीका तर्फबाट निर्देशन समितिको संयोजक बनाइएका केन्द्रीय सदस्य मधु आचार्यमाथि देउवा र थापाको निर्देशनमा एकलौटी गरेको आरोप छ । अर्को पक्षलाई भोट हाल्नसमेत नदिएर सानेपा र बुढानिलकण्ठको इच्छा अनुरुप नेतृत्व चयन गरिएको  प्रतिनिधिहरुले गुनासो गरेका छन् । 

समितिका दुई सदस्य मदनकृष्ण श्रेष्ठ र सरस्वती बजिमयको सहमतिबिनै आचार्यले एकल रुपमा निर्वाचन प्रक्रिया अगाडि बढाएको भन्दै एउटा पक्षले परिणाम अस्विकार गरेपछि चुनावको बैधताको प्रश्नसमेत जन्मिएको छ । निर्देशन समितिकी सदस्य बजिमय हाल अमेरिकामा छन् । समितिका अर्का सदस्य श्रेष्ठले पनि नेतृत्व चयन प्रक्रिया बहिस्कार गरेर हिँडेका थिए । 

गत शुक्रबार उद्धघाटन भएको महाधिवेशनमा शनिबार नयाँ नेतृत्व चयनका लागि निर्वाचन गर्ने कार्यतालिका थियो । अध्यक्षका लागि माधव चम्लागाई, विकास थापा र कल्पना खड्का प्रतिश्पर्धी थिए । उनीहरुले मतदानका बेला प्रहरी लगाएर प्रतिनिधिसँग मत माग्न र मतदानस्थल वरपर जानसमेत नदिएको दाबी गरेका छन् । 

देउवा र गगनको हस्तक्षेपपछि अध्यक्षका उम्मेदवार खड्का र थापाले निर्वाचन नै बहिस्कार गरेका हिंड्न बाध्य भएको सो पक्षको जिकिर छ । अर्कोतिर, चुनाव गराउने जिम्मेवारी पाएका निर्देशन समितिका संयोजक आचार्यमाथि समितका सदस्यले प्रक्रिया छाडेर हिंडेपछि मतदाता नामावलीको सूचीमा एकलौटी गरेको आरोपसमेत लागेको छ । 

मत हाल्न चाहने प्रतिनिधिको हस्ताक्षर पनि नगराइनुले धाँधली प्रश्ट देखिएको जनाइएको छ । समाचार स्रोतले भनेअनुसार मुलुकभरबाट काठमाडौं आएका एक हजार एक सय ८८ मतदातामध्ये अन्तिम भोटर लिष्टमा आठ सय ९४ जना प्रतिनिधि र एक सय १७१ केन्द्रीय समितिका पदाधिकारीको नाम भित्तामा टाँसिएको थियो । 

पार्टीकै भातृ संगठनको चुनावमा मनलाग्दी भएको बिषयमा अध्यक्षका दाबेदार खड्का र थापाले शनिबार नेता डा.शेखर कोइरालालाई भेटेर गुनासो पनि गरे । एकलौटी गर्दै व्यापक धाँधली भएकाले मतगणना स्थगित गरेर विधिपूर्वक चुनाव गर्नुपर्ने माग उनीहरुको थियो । निर्वाचन गैह्रकानुनी तरिकाले गराइएको भन्दै कोइरालाले चुनाव स्थगित गर्न लगाउने आश्वासन दिएपछि थापा र खड्का फर्किए । 

तर, दुई भाइलाई भोट हाल्न व्यवधान खडा गरेपछि चम्लागाईंलाई जिताउन चार सय ७० मात्र मत खसाइएको आरोप लागेको छ । अन्तिममा एक पक्षको चुनाव वहिष्कारबीच बुथमा एकपक्षीय प्रतिनिधि राखेर मतगणना गर्दै परिणाम घोषणा गरिएको जनाइएको छ । 

बादविवाद र बहिष्कारकैबीच निर्वाचन समितिले अध्यक्षमा चम्लागाईं निर्वाचित भएको घोषणा गरेको थियो । कूल खसेको मतको झन्डै ८८ प्रतिशत भोट चम्लागाईंले पाएको भनिएको छ ।  उनले तीन सय ५१, थापाले ८८ र खड्काले १३ मत मात्र प्राप्त गरेको बताइएको छ । 

अध्यक्षमा निर्वाचित भनिएका चम्लागाईं महामन्त्री गगन थापा निकट हुन् । उनलाई सभापति देउवाकोसमेत समर्थन थियो । यता, असन्तुष्ट समूह पुनः निर्वाचनको माग गर्दै अदालतमा जाने तयारीमा छ ।