अध्यादेश पारितसँगै संसद अधिवेशन अन्त्यको तयारी

सरकारले ल्याएका पाँच वटा अध्यादेशको प्रतिस्थापन विधेयक राष्ट्रिय सभाबाट पनि पारित भएको छ । चैत ४ र ५ गते प्रतिनिधिसभाबाट पारित भएका अध्यादेशको प्रतिस्थापन विधेयक आज बसेको राष्ट्रिय सभाको बैठकले पारित गरेको हो । 

सभाध्यक्ष नारायणप्रसाद दाहालले ‘सुशासन प्रवद्र्धन तथा सार्वजनिक सेवा प्रवाहसम्बन्धी केही नेपाल ऐनलाई संशोधन गर्ने विधेयक, २०८१’, ‘सहकारीसम्बन्धी केही नेपाल ऐनलाई संशोधन गर्ने विधेयक, २०८१’, ‘आर्थिक कार्यविधि तथा वित्तीय उत्तरदायित्व (पहिलो संशोधन) विधेयक, २०८१’ तथा ‘निजीकरण (पहिलो संशोधन) विधेयक, २०८१’ र ‘आर्थिक तथा व्यावसायिक वातावरण सुधार र लगानी अभिवृद्धिसम्बन्धी केही नेपाल ऐनलाई संशोधन गर्ने विधेयक, २०८१’ बहुमतले पारित भएको घोषणा गर्नुभयो । 

यदि बैठकले प्रतिस्थापन विधेयक पारित गर्न नसकेको भए आज राति १२ बजेबाट पाँच वटा अध्यादेश स्वतः निष्क्रिय हुने थिए । तर अब सभाले पारित भएको विधेयक प्रतिनिधिसभामा पठाउने छ । 

सभाले यसअघि नै विधेयकउपर दफावार छलफल चलाएकोमा विभिन्न राजनीतिक घटनाक्रम र अवरोधले पारित हुन ढिला भएको हो । 

यता सरकारले संसद्को हिउँदे अधिवेशन अन्त्यबारे छलफल र परामर्श थालेको छ । आज बस्ने मन्त्रिपरिषद्को बैठकले त्यसबारे छलफल र निर्णय हुने बुझिएको छ । 

प्रधानमन्त्री केपी शर्मा ओली भोलि थाइल्याण्ड र सभामुख देवराज घिमिरे अन्तरव्यवस्थापिका संघ (आईपीयू) को १५०औं महासभामा सहभागी हुन पर्सि उज्वेकिस्तान जाने कार्यक्रम छ ।