तीनकुनेमा मारिएका पत्रकारकी पत्नीलाई रोजगारी दिने प्रधानमन्त्रीको वाचा

प्रधानमन्त्री केपी शर्मा ओलीले तीनकुने प्रकरणमा ज्यान गुमाएका पत्रकार सुरेश रजकको परिवारसँग भेट गर्नुभएको छ । उहाँले आज दिउँसो प्रधानमन्त्रीको सरकारी निवास बालुवाटारमा मृतक परिवारसँग भेटेर दुःख व्यक्त गर्दै उक्त आश्वासन दिनुभएको हो ।

भेटमा प्रधानमन्त्री ओलीले शुक्रबारको घटनामा संलग्न जो कोहीलाई कारबाही गरिने विश्वास दिलाउनुभएको छ । सुरेशकी पत्नीलाई राम्रो जागिरको व्यवस्थापन गरिदिने वाचा पनि गर्नुभएको बताइएको छ । राजसंस्था पुनस्थापनाको मागसहित राजावादीले तीनकुनेमा आयोजना गरेको प्रदर्शनको क्रममा पत्रकार सुरेशको एउटा घरभित्र जलेर मृत्यु भएको थियो । सो क्रममा एक जना प्रदर्शनकारीले पनि ज्यान गुमाएका थिए । 

उक्त घटनामा प्रहरीले व्यापक छानबिन र अनुसन्धान गरिरहेको छ । घटना भएको दिन कार्यक्रमस्थलमा खिचिएका फोटो तथा भिडियो उपलब्ध गराइदिन हिजो सर्वसाधारणसँग अपिल गरेको प्रहरीले राप्रपाका वरिष्ठ उपाध्यक्ष रविन्द्र मिश्र र महामन्त्री धवलशमशेर राणासहित ४१ जनाविरुद्ध मुद्दा चलाउने गरी प्रतिवेदन तयार पार्दैछ । 

कार्यक्रमका मुख्य नाइके एवम् जनकमाण्डर भनिएका दुर्गा प्रसाईं भने शुक्रबारदेखि नै फरार छन् । उनले हिजो एक भिडियो सन्देश जारी गर्दै राजधानीकै एक मन्दिरमा बसिरहेको बताएका थिए । तर कतिपयले उनको सन्देशप्रति नै आशंका गरिरहेका छन् ।