राजावादीको तोडफोड प्रतिकार गर्ने कर्मचारीलाई भाटभटेनीको सम्मान

राजावादी तोडफोड र लुटपाटको शिकार बनेको भाटभटेनी सुपरमार्केटले मर्मत कार्यमा खटिएका कर्मचारीलाई सम्मान गर्ने भएको छ ।

भाटभटेनीका अध्यक्ष मीनबहादुर गुरुङले भोलि बिहान ९ बजे काठमाडौंको कोटेश्वरस्थित भाटभटेनी परिसरमा उनीहरूलाई सम्मान गर्न लागेका हुन् । राजावादीहरुले तोडफोड र लुटपाट गरिरहँदासमेत आफ्नो कर्तव्य निर्वाह गरी व्यापार व्यवसायलाई निरन्तरता दिन रातभर मर्मत सम्भारको काममा खटिएकाले थप प्रोत्साहन र मनोबल बढाउन कर्मचारीलाई सम्मान गर्न लागेको भाटभटेनीले जनाएको छ । 

गत शुक्रबार कोटेश्वरस्थित तीनकुनेमा राजावादीहरुले गरेको आन्दोलनमा भाटभटेनी पनि निशानामा परेको थियो । राजावादीहरुले कोटेश्वरको भाटभटेनी स्टोर भवन तोडफोड गर्नुका साथै लुटपाट मच्चाएका थिए । त्यसबाट ८० लाख रुपैयाँभन्दा बढी क्षति पुगेको मूल्याङ्कन गरिएको छ ।