कोशीमा प्रलेसको नयाँ कार्यसमिति

वामपन्थी लेखक तथा साहित्यकारहरुको साझा संगठन ‘प्रलेस नेपाल’ को कोशी प्रदेश तेस्रो अधिवेशन सम्पन्न भएको छ । अधिवेशनले बिन्दु दाहाल अध्यक्ष, दिनेश थापा उपाध्यक्ष, शान्ति पाख्रिन महिला उपाध्यक्ष, रविन कोर्काली सचिव, कमल भट्टराई सहसचिव, डिल्लीराम परदेशी कोषाध्यक्षसहित २१ सदस्यीय कार्यसमिति निर्विरोध निर्वाचित गरेको छ ।

कार्यसमिति कार्यकाल तीन वर्षको हुनेछ । संगठनको कोशी प्रदेश पहिलो अधिवेशन २०७५ चैत ९ गते र दोस्रो २०७८ चैत १२ गते भएको थियो । गत शनिबार मोरङको सुन्दर हरैंचा नगरपालिकामा रहेको सुकुना बहुमुखी क्याम्पसमा सफलतापूर्वक तेस्रो अधिवेशन सम्पन्न गरिएको हो । 

तिला लेकालीको अध्यक्षतामा भएको अधिवेशनमा प्रमुख अतिथि प्रलेसका केन्द्रीय उपाध्यक्ष नमुना शर्मा र विशिष्ठ अतिथि महासचिव डा. देवी क्षेत्री दुलाल थिए । प्रलेसका कामहरु धेरै रहेको उल्लेख गर्दै सबै वक्ताहरुले मुलुकको अवस्था परिवर्तनका लागि कलम चलाउन आग्रह गरेका छन् । 

उनीहरुले गणतन्त्र रक्षाका लागि सचेत रहनुपर्नेतर्फ औंल्याएका छन् । सोही क्रममा साहित्यकार डा.देवी क्षेत्री दुलाल र ज्ञानु बुढाथोकीलाई प्रशंसापत्रसहित दोसल्ला ओढाएर सम्मान गरिएको थियो ।