राप्रपालाई धकेल्दै दुर्गा प्रसाईंकै ठाउँमा पुर्याइयो

राष्ट्रिय प्रजातन्त्र पार्टीलाई भोलि राजधानीमा हुने प्रदर्शन तथा विरोधसभा पह्रार दुर्गा प्रसाईका निम्ति तोकिएकै स्थानमा गर्न निर्देशन दिइएको छ । जिल्ला प्रशासन कार्यालय,काठमाडौंले प्रदर्शनी मार्गको सट्टा सिफल वा बल्खुमा कार्यक्रम गर्न लिखित विकल्प दिएको छ । 

दुई वर्षअघि दुर्गा प्रसाईंको समूहले राजतन्त्रको पक्षमा राखेको विरोध प्रदर्शनका निम्ति  बल्खु तोकिएको थियो । त्यहाँ पनि प्रहरी र प्रदर्शनकारीबीच भिडन्त भयो । भोलि राखिएको कार्यक्रम जनमोर्चालगायत विभिन्न समूहको पूर्व निर्धारित विरोध प्रदर्शनका कारण  सिफल वा बल्खुमा सार्न राप्रपालाई भनिएको हो । जिल्ला प्रशासन कार्यालयले ‘सुरक्षा संवेदनशीलता’ भन्दै शहरको केन्द्र भागबाट राप्रपालाई यसरी किनारामा धकेलेको छ ।

 

राप्रपा बागमती प्रदेश कार्यसमितिले आयोजना गर्न लागेको विरोध प्रदर्शनको कार्यक्रम सुन्धारामा भेला भएर जुलुससहित भृकुटीमण्डपमा पुग्ने थियो । अब भने बल्खुमा जम्मा भएर त्यहीँ आमसभा गर्ने हिसाबले कुरा मिलाइएको छ । 

२०४६ सालको जनआन्दोलन उत्कर्षमा पुगेको दिन पारेर राप्रपाले कार्यक्रम गर्न लागेको सम्बन्धमा उक्त पार्टीका एक जना नेता भन्छन्, ‘चैत १५ अघि गर्ने कुरा हो तर एसईई परीक्षाका कारण धकेलियो । त्यसपछि दुर्गा प्रसाईंले कार्यक्रम गरे । गत वर्ष पनि चैत २७ गते यस्तै कार्यक्रम राखिएको थियो ।’