स्ववियु पदाधिकारीप्रति क्रान्तिकारीको आपत्ति, खारेजीकाे माग

काठमाडौंको प्रदर्शनीमार्गस्थित रत्न राज्यलक्ष्मी क्याम्पसको स्ववियु निर्वाचन समितिद्वारा प्रकाशित ‘स्ववियु निर्विरोध निर्वाचित’ सम्बन्धी सूचनाप्रति अनेरास्ववियु (क्रान्तिकारी) क्याम्पस कमिटीले आपत्ति जनाएको छ । सो सूचनाले लोकतान्त्रिक विधिमा विश्वास गर्ने विद्यार्थी समाजलाई गम्भीर आघात पुर्याएको भन्दै कमिटीले विरोध गरेको हो । 

कमिटीका उपाध्यक्षहरु दिपक विष्ट र लक्ष्मण सुनार, सचिवप टोपबहादुर कार्की र सहसचिवहरु पासाङ पुन र रमेश नेपालीले आज विज्ञप्ति जारी गर्दै एकपक्षीय र सत्ता प्रेरित यो कदमले विद्यार्थीको सहभागितामूलक अधिकारमाथि खुला प्रहार गरेको बताएका छन् । 

उच्च अदालत पाटनले अन्तरिम आदेशमार्फत निर्वाचन मिति तोकी प्रक्रिया अघि बढाउन स्पष्ट निर्देशन दिइसकेको अवस्थामा त्यसको उल्लंघन गर्दै निर्विरोध घोषणा गर्नु विधिको शासन, विद्यार्थी चेतना र लोकतान्त्रिक मूल्य मान्यतामाथिको सिधै अपमान भएको उनीहरुको ठहर छ । अलोकतान्त्रिक र षड्यन्त्रपूर्ण गरिएको उक्त घोषणा आफूहरुले कदापि स्वीकार्य नगर्ने भन्दै उनीहरुले त्यसलाई तत्काल खारेज गरी निर्वाचन प्रक्रिया अघि बढाउन माग गरेका छन् । 

विज्ञप्तिमा भनिएको छ, ‘हामी अखिल (क्रान्तिकारी) यस प्रकारको अलोकतान्त्रिक, षड्यन्त्रपूर्ण र अवैध अभ्यासलाई कदापि स्वीकार्य गर्दैनौं । हामी तीन वटा स्पष्ट माग राख्दछौं, पहिलो निर्विरोध भनिएको त्यो घोषणा तत्काल खारेज गरियोस् । दोस्रो अदालतको आदेशको पूर्ण पालना गर्दै निष्पक्ष, पारदर्शी र समावेशी निर्वाचन प्रक्रिया तुरुन्त अघि बढाइयोस् र तेस्रो स्ववियु निर्वाचनको नयाँ मिति तुरुन्त सार्वजनिक गरियोस् ।’ आफ्ना मागलाई बेवास्ता गरिएमा आन्दोलनका चरणबद्ध कार्यक्रम घोषणा गरी संघर्षमा उत्रिने चेतावनीसमेत दिइएको छ ।