देउवालाई बेलैमा कुर्सी बुझाउने प्रधानमन्त्रीको बाचा
संसद्को सबैभन्दा ठूलो दल नेपाली कांग्रेसको सहयोगमा प्रधानमन्त्री बनेका केपी शर्मा ओलीले आलोपालो सहमति परिपालनामा इमान्दार बन्ने प्रतिवद्धता दोहोर्याउनुभएको छ ।
सरकारको निरन्तरतामाथि प्रश्न उठ्दा 'शेरबहादुर देउवालाई समयमै सत्ता हस्तान्तरण गर्छु' भन्ने गर्नुभएका उहाँले आज पनि त्यहि कुरा गर्नुभएको हो । एउटा सार्वजनिक कार्यक्रममा प्रम ओलीले १४ महिनापछि देउवालाई छैठौँ पटक प्रधानमन्त्री जुर्ने दाबी गर्नुभयो ।
‘अब शेरबहादुरजी पाँचपटक प्रधानमन्त्री हुनुभयो । मौका उहाँलाई जुर्छ । मैले १४ महिनापछि शेरबहादुरजीलाई प्रधानमन्त्री भनेर किस्तीमा राखेर बकाइदा धुमधामसँग हस्तान्तरण गर्छु’, उहाँले भन्नुभयो ।
गत वर्ष असार १७ गते नेपाली कांग्रेस र एमालेबीच सत्ता सहकार्यका लागि भएको सात बुँदे सहमतिमा ओली र देउवा आलोपालो प्रधानमन्त्री हुने कुरा उल्लेख छ । तर, उक्त सम्झौता पालनमा दुवैतर्फबाट शंका व्यक्त हुने गरेको छ । खासगरी ओलीप्रति कांग्रेस नेताहरु ढुक्क हुन नसकेको देखिन्छ ।
यो स्थितिमा देउवालाई खुसी बनाएर सरकार जोगाउनुपर्ने बाध्यतामा रहेका प्रधानमन्त्री ओलीले आफ्ना प्राय: सबैजसो भाषणमा उक्त आलोपालो सहमति पूर्णत: कार्यान्वयन गर्ने प्रतिवद्धता जनाउँदै आउनुभएको छ ।
टिप्पणीहरू