आलमलाई चोख्याउने फैसलाविरुद्ध अर्को साता पुनरावेदन दर्ता गरिने

रौतहट नरसंहारका अभियुक्त नेपाली काँग्रेसका नेता एवं पूर्वमन्त्री मोहम्मद अफताब आलमलाई सफाइ दिने फैसलाविरुद्ध महान्यायाधिवक्ताको कार्यालय अर्को साता सर्वोच्च अदालत जाने भएको छ । कार्यालयले  फैसलाविरुद्ध पुनरावेदन गर्ने निर्णय गरेको हो ।

महान्यायाधिवक्ता कार्यालयका प्रवक्ता सहन्यायाधिवक्ता सूर्यराज दाहालले अबको एकाध दिनमै सर्वोच्चमा पुनरावेदन दर्ता गरिने बताए । उनका अनुसार उच्च सरकारी वकिल कार्यालय, वीरगञ्जले पुनरावेदन पत्रको मस्यौदा तयार पारेर पठाइसकेको छ । सोहीअनुसार कार्यालयले पुनरावेदन गर्ने निर्णय पनि गरिसकेको उनले जानकारी दिए। 

‘कार्यालयले मस्यौदा तयार पारिसकेको छ । यहाँबाट पुनरावेदन दर्ताको निर्णय भइसकेको छ । अबको एकाध दिनमै दर्ता गर्छौं’,उनले भने । उच्च अदालत जनकपुर, वीरगञ्ज इजलासका न्यायाधीशद्धय खुशीप्रसाद थारु र अर्जुन महर्जनको संयुक्त इजलासले गत जेठ १४ गते उनलाई सफाइ दिएको थियो । त्यसअघि रौतहट जिल्ला अदालतले इँट्टाभट्टामा ज्युँदै मान्छे जलाएको अभियोगमा उनलाई दोषी ठहर गर्दै जन्मकैदको सजाय तोकेको थियो । 

उनलाई सफाइ दिने न्यायाधीशद्धयलाई न्याय परिषद्मा तानेर छानबिन अगाडि बढाइएको छ ।