केरुङ्गमा रोकिएकालाई तातोपानी नाकाबाट स्वदेश फर्काइँदै

नेपाललाई चीनसँग जोड्ने रसुवास्थित नाकामा रहेको ‘मितेरी पुल’ बाढीले बगाउँदा केरुङ्गमा रोकिएका नेपाली नागरिकलाई वैकल्पिक बाटोबाट स्वदेश फर्काइने भएको छ । सिन्धुपाल्चोकको तातोपानी नाकाको प्रयोग गरेर चिनियाँ पक्षले नेपालीलाई स्वदेश फर्काउन लागेको हो । 

उनीहरुलाई फर्काउनका लागि सरकारको तर्फबाट हुनुपर्ने सम्पूर्ण काम भइसकेको रसुवाका प्रमुख जिल्ला अधिकारी अर्जुन पौडेलले बताए । ‘नेपाली पक्षले चिनियाँ पक्षलाई पत्राचारलगायत सबै काम गरिसकेको छ । हिजो बेलुका उनीहरुलाई सिन्धुपाल्चोकको तातोपानी नाकाबाट फर्काउने जानकारी प्राप्त भएको छ । हाल फर्किन चाहनेहरुको विवरण संकलनको काम भइरहेको छ’,उनले भने । 

केरुङ्गमा रोकिएकाहरुलाई चिनियाँ सरकारले नै खाने–बस्ने व्यवस्था गरिरहेको पनि उनले बताए । गत असार २४ गते बिहानैदेखि भोटेकोशी र स्थानीय ल्हेन्दे खोलामा आएको भीषण बाढीले रसुवागढी, टिमुरेस्थित भन्सार क्षेत्रमा ठूलो क्षति पुर्याएको थियो । 

बाढीले चीन जोड्ने मितेरी पुलसहित भन्सार क्षेत्रमा राखिएका विद्युतीय गाडी र कन्टेनरहरुसमेत बगाएको हो । सो बाढीमा प्रहरीसहित नेपाली र चिनियाँ नागरिक बेपत्ता भएका थिए ।