उपाध्यक्ष बर्खास्त गरेका बालेन अख्तियारमा, विज्ञको अमेरिका घुम्ने तयारी

काठमाडौं महानगरपालिकाका मेयर बालेन्द्र (बालेन) साहले शहरी योजना आयोगका उपाध्यक्ष डा. सुमन नरसिंह राजभण्डारीलाई बर्खास्त गरेका छन् । आफैंले नियुक्त गरेका उनलाई बालेनले पदबाट हटाएका हुन् । 

यद्यपि, उनलाई हटाउनुको कारण भने खुलाइएको छैन । बालेनले राजभण्डारीलाई कार्यकक्षमा प्रवेश गर्न नदिन कडा निर्देशन दिएको स्रोत बताउँछ । महानगर प्रहरी बलका प्रहरी उपरीक्षक (एसपी) विष्णुराज जोशीले उपाध्यक्ष राजभण्डारीलाई कार्यकक्षमा प्रवेश गर्न नदिन आदेश आएको पुष्टि गरे । 

तर, राजभण्डारीलाई कार्यकक्षबाट गलहत्याइएको कुरा गलत भएको उनको दाबी छ । जनआस्थासँगको कुराकानीमा जोशीले भने,‘उहाँसँग भेट भएको हो । तर, उहाँलाई कार्यकक्षबाट निस्किन भनेका थिएनौं ।’ यता, महानगर प्रहरी बलका प्रमुख वरिष्ठ प्रहरी उपरीक्षक (एसएसपी) राजुनाथ पाण्डे सो विषयमा आफूलाई जानकारी नभएको बताउँदै पन्छिए । 

‘मलाई केही थाहा छैन’,उनले भने । महानगरका सहायक प्रवक्ता ध्रुवकुमार काफ्लेले उनलाई हटाइएको जानकारी भने दिए । भन्छन्,‘म हिजो कार्यालय आएको थिइनँ । आज आउँदा उहाँलाई हटाइएको जानकारी पाएँ । के कारणले हो ? त्यो भने थाहा छैन । आयोगका पदाधिकारीलाई नियुक्त गर्ने र हटाउने अधिकार मेयरसाबमा नीहित छ ।’

महानगरको २१ औं कार्यपालिका बैठकले उनलाई उपाध्यक्षमा नियुक्त गरेको थियो । स्ट्रक्चरल इञ्जिनियर राजभण्डारीलाई बालेनले मेयर हुनुअघि इञ्जिनियरिङको काममा सहयोग गर्दै आएका थिए । दुई वर्षपछि मेयरले उनलाई बर्खास्त गरेका हुन् । 

अमेरिका जाँदै यी सदस्य

बालेनका दाहिने हातका रुपमा चिनिने आयोगका विज्ञ सदस्य शैलेन्द्र झा अमेरिका जाने भएका छन् । उनी महानगरबाट अमेरिका जान लागेको स्रोतले बतायो । यद्यपि, झाले भने महानगरको तर्फबाट अमेरिका जान लागेको अस्वीकार गरे । 

जनआस्थासँगको कुराकानीमा उनले भने,‘अमेरिका जाने भन्नेचाँहि हो तर कन्फर्म भइसकेको छैन । गएपनि महानगरबाट होइन । म अहिलेसम्म महानगरको खर्चमा कतै गएको छैन ।’ अन्तर्राष्ट्रिय सम्बन्ध सचिवालयका प्रमुख बलराम त्रिपाठीले उनको अमेरिका घुमघामको प्रोग्रामबारे जानकारी नभएको बताए । 

‘सचिवालयलाई कुनै जानकारी दिइएको छैन । पर्सनल्ली जान लाग्नुभएको होला’,उनले भने । आर्थिक वर्ष २०८०–८१ मा मेयरका आसेपासेको विदेश भ्रमणमा ५२ लाख ५४ हजार ७७ रुपैयाँ ७५ पैसा खर्च भएको छ । जसलाई महालेखा परीक्षकको कार्यालयले बेरुजु ठहर्याइसकेको छ । 

यता, अख्तियार दुरुपयोग अनुसन्धान आयोगले बालेनलाई बयानमा बोलाएको बताइन्छ ।