‘मेयर’ लाई थन्काएर ‘क्याप्टेन साब’तिर लागे खनाल

एक जना मेयरको बायोपिक चलचित्र बनाउन खोज्दा नराम्ररी डुबेका निर्देशक दिपेन्द्र के खनाल पुनः अर्को बायोपिक फिल्म बनाउन कस्सिएका छन् । 

उनले अन्नपूर्ण मिडिया ग्रुप र सिम्रिक एयरका अध्यक्ष क्याप्टेन रामेश्वर थापाको जीवनीमा आधारित चलचित्र बनाउन लागेका हुन् । ‘क्याप्टेन साब’ नाम दिइएको उक्त चलचित्रको अहिले छायाँकन भइरहेको छ । 

चलचित्रमा अभिनेता खगेन्द्र लामिछाने र सुरक्षा पन्त मुख्य भूमिकामा रहेको बताइएको छ । चलचित्रको लगानी तीन करोडभन्दा बढी रहेको बुझिन्छ । 

स्मरणीय छ, निर्देशक खनालले यसअघि सर्लाहीको बागमती नगरपालिकाका मेयर भरत थापाको जीवनीमा आधारित चलचित्र ‘मेयर’ निर्माण गरेका थिए । यद्यपि, उक्त चलचित्र प्रदर्शनमा आउन सकेन । 

तामझामसहित छायाँकन गरिएको उक्त फिल्म सम्पादन हुँदै गर्दा मेयर थापाविरुद्ध अख्तियार दुरुपयोग अनुसन्धान आयोगमा पहिलाे उजुरी परेको थियो । त्यतिबेला निर्माणले टिमले उक्त मुद्दा किनारा लागेपछि प्रदर्शन गर्ने तयारी गरेको थियो । 

तर, परिस्थिति यस्तो बन्यो कि थापाविरुद्ध एकपछि अर्को उजुरी पर्यो र अदालतमा चार वटा मुद्दा दर्ता भयो । यसरी मेयर मुद्दा मामिलामा फसेपछि निर्देशक खनालले 'मेयर' लाई थन्काएर नयाँ चलचित्रमा हात हालेका हुन् ।