सरकार जोगाउन त्यता पनि त्यही सिको

आफ्नो सरकार जोगाउन प्रधानमन्त्री केपी शर्मा ओलीले हठात संसद अधिवेशन अन्त्य गरेको सिको टिप्दै गण्डकी प्रदेशका मुख्यमन्त्री पृथ्वीसुब्बा गुरुङले पनि मध्यराति हाउस बन्द गर्नुभएको छ । आफूबिरुद्ध अविश्वासको प्रस्ताव आउने निश्चित भएपछि गुरुङले हतारमा राती १२ बजे संसद अधिवेशन अन्त्य गर्नुभएको हो ।

“यसले मुख्यमन्त्री अविश्वासको प्रस्ताव फेस गर्न नसकेर भाग्न खोज्नुभएको देखाउँछ । तर उहाँ कतिदिन भाग्न सक्नुहुन्छ र !”

गुरुङविरुद्ध अविश्वासको प्रस्ताव दर्ता गराउने प्रतिपक्षी दलको तयारी अन्तिम अवस्थामा पुगेका बेला हठात अधिवेशन अन्त्य गरिएको जसपाका सांसद हरिशरण आचार्यले बताउनुभयो । अविश्वासको प्रस्ताव छल्न यस्तो छलछाम गरिएको उहाँको भनाइ थियो ।

‘आजै अविश्वास प्रस्ताव दर्ता गराउने तयारी थियो,तर बिना छलफल अधिवेशन अन्त्य गरियो । यसले मुख्यमन्त्री अविश्वासको प्रस्ताव फेस गर्न नसकेर भाग्न खोज्नुभएको देखाउँछ । तर उहाँ कतिदिन भाग्न सक्नुहुन्छ र ! हामी नयाँ ढंगले छलफल गर्दैछौँ’, उहाँले भन्नुभयो ।

माओवादी केन्द्र र जनमोर्चाले समर्थन फिर्ता लिने घोषणा गरेपछि स्पष्ट अल्पमतमा परेको गुरुङ नेतृत्वको सरकार ढल्ने निश्चित थियो । ६० सदस्यीय प्रदेशसभामा सरकार गठनका लागि ३१ सांसद आवश्यक हुन्छ । एमालेसंग २७ सांसद छन् । एक जना स्वतन्त्र सांसद दिपक मनाङ्गे गुरुङको पक्षमा उभिँदा पनि उनलाई सरकार टिकाउन थप ३ जना पुग्दैन । तीन सिट रहेको जनमोर्चालाई फकाउन गरिएको अन्तिम प्रयास असफल भएपछि अधिवेशन नै अन्त्य गरिएको हो ।

सांसद आचार्यले भने विशेष अधिवेशन बोलाएर भएपनि सरकार फाल्ने चेतावनी दिनुभयो । ‘परिस्थिति अलिकति नयाँ ढंगले विकास हुने देखियो । हामी नयाँ ढंगले छलफल गर्छौँ । त्यो भनेको विशेष अधिवेशन माग गर्ने कुरा नै हो ।’

विपक्षी गठवन्धनले कांग्रेसका कृष्णचन्द्र नेपालीलाई नयाँ मुख्यमन्त्री बनाउने तयारी थालिसकेको थियो । ‘यो सरकार जानुपर्छ भन्नेमा हाम्रो सैद्धान्तिक सहमति हो । मुख्यमन्त्रीका रुपमा हामीले कृष्णचन्द्रजीलाई समर्थन गरेका छौँ । थप जिम्मेवारी बाँडफाडका कुरामा छलफल गर्दै जाने सहमति भएको छ’, आचार्यले भन्नुभयो ।