उपस्थित २४,मतदान ६,हाजिर गरेर माननीय हराए

हिजो संसदमा भएको प्रधानमन्त्री केपी शर्मा ओलीद्वारा प्रस्तुत विश्वासको मतसम्बन्धी प्रस्तावमा २४ जना कोरोना संक्रमित माननीय संसदमा हाजिर भए पनि ६ जनाले मात्र मतदान गरेका छन् ।

६ जनाले मतदान गरेकोमा तीमध्ये २ जनाले पक्षमा,२ जनाले विपक्षमा र २ जना तटस्थ बसेको सचिवालय श्रोतले बताएको छ । कोरोना संक्रमित सांसदहरू सबै पार्टीका थिए ।

त्यसैगरी प्रधानमन्त्रीले आफ्नो पार्टीको मात्र मत पाएको देखियो । उता,माधव पक्षतिर लाग्ने घोषणा गर्नुभएका वामदेव गौतमकी श्रीमती माननीय तुलसा थापाले पनि प्रधानमन्त्रीकै पक्षमा मतदान गर्नुभएको थियो ।

जसपाका मतदान गर्न योग्य ३० जना सांसदमध्ये १५ जनाको दरले विपक्ष र तटस्थमा बसेका थिए । दुई जना संक्रमित अनुपस्थित भए । उपस्थित भएमध्ये पनि उपेन्द्र पक्षका दुई जना सांसद महन्थ ठाकुरतिर र महन्थका भनिएका दुई जना उपेन्द्रतिर लागेको पनि देखियो ।

राप्रपाका एक्ला सांसद राजेन्द्र लिङ्देन झापामा रहेकाले बैठकमा अनुपस्थित भएको बताइन्छ । त्यसमा पनि उहाँ कोरोना संक्रमित ।

संसदको कूल २ सय ७५ जना सांसदमध्ये माओवादीका चार जना कारबाहीमा परेपछि पद रिक्त छ । सभामुख अग्निप्रसाद सापकोटा र अन्य चार जना निलम्बित सांसद घटाउँदा मतदान गर्न योग्य सांसद संख्या २ सय ६६ हुन आउँछ । त्यसमध्ये २ सय ३२ मत मात्रै खसेको थियो ।

तर,संसदको हाजिर दुई वटा बैठकमा फरक फरक पाइएको छ । पहिलो बैठकमा २ सय ४१ जना सांसद उपस्थित थिए । दोस्रो बैठकमा हाजिरी संख्या २ सय १९ मात्र देखिएको छ । संसद सचिवालय स्रोतका अनुसार १५ मिनेटको अन्तरमा बोलाइएको दोस्रो बैठकमा थोरै सांसदले हाजिरी गरेको हुनसक्छ।

चार जना सांसदले हाजिर गरे पनि मतदान प्रक्रियामा सहभागी भएको देखिँदैन ।