चौरजहारीमा एक सातामा अक्सिजन प्लान्ट सञ्चालन हुने

कोरोना संक्रमितहरुको उपचारको लागि अक्सिजन अभाव भईरहेको बेला रुकुम पश्चिमको चौरजहारी नगरपालिकाले अक्सिजन प्लान्ट सञ्चालन गर्ने भएको छ ।

कोरोना भाइरसको नयाँ भेरियन्टको कारण संक्रमितहरुको संख्या बढीरहेको र उपचारको क्रममा अक्सिजन नभएर ज्यान गुमाउनेहरुको संख्या बढीरहको बेला चौरजहारीले अक्सिजन प्लान्ट जडान गर्ने भएको हो ।

लक्षण सहितका कोरोना भाइरस संक्रमितहरुको सफल उपचारको लागि अक्सिजन ल्यान्ट जरुरी रहेकोले खरिदको काम सुरुवात गरिएको नगरपालिकाले जनाएको छ ।

चौरजहारी नगरपालिका प्रमुख बिशाल शर्माले अक्सिजन प्लान्ट जडान गरेर हाल यस क्षेत्रका संक्रमितहरुको उपचारमा प्रभावकारीता ल्याउने बताए । उनका अनुसार कोरोना संक्रमितका अतिरिक्त अन्य बिरामीहरुको लागि समेत अक्सिजन प्लान्ट अत्यावश्यक रहेको छ ।

चौरजहारी अस्पतालसँग समन्वय गरेर अक्सिजन प्लान्टको खरिद र जडानको काम सुरुवात गरिएको र प्राविधिक समस्या नआएमा एक सातामा सञ्चालन हुने नगर प्रमुख शर्माले जनाए ।

अक्सिजन प्लान्ट सञ्चालनको लागि करिब ९० लाखको लागत अनुमान गरिएको छ । ‘अहिले कर्णाली प्रदेश सरकारलाई केहि सहयोग गरिदिनु प¥र्यो भनेका छौ’, नगर प्रमुख शर्माले भने ‘प्रदेशबाट हुन सकेन भनेपनि नगरपालिकाले बजेट व्यबस्थापन गर्नेछ ।’

हाललाई चौरजहारी अस्पतालसँग समन्वयमा सञ्चालन गरिने उक्त अक्सिजन प्लान्टबाट अक्सिजन उत्पादन र सिडिण्डरमा जम्मा गर्ने काम हुनेछ ।

चौरजहारी नगरपालिकाले कोरोना भाइरस रोकथाम, नियन्त्रण तथा उपचारको लागि बिभिन्न सचेतिकरणका कार्यक्रमको साथै ४५ बेडको आइशोसलेन अस्पताल समेत सञ्चालन गरेको छ । नरपालिकाका विभिन्न ३ ठाउँमा १५/१५ बेडका आइसोलेसन अस्पताल निर्माण गरेको नगरपालिकाले जनाएको छ ।

नगर क्षेत्रका खोलागाउँ, कोटजहारी र चौरजहारी सेवा केन्द्रमा अक्सिजन सिलिन्डर, कन्सन्टेटरको व्यवस्था सहितका आईसोलेशन अस्पताल बनाईएको नगर प्रमुख शर्माले उल्लेख जानकारी दिए ।

चौरजहारी नगरपालिकाले १ करोड २३ लाख रुपैयाँमा गत बर्षको असार दोस्रो साता देखि पिसिआर परिक्षण प्रयोगशाला समेत सञ्चालनमा ल्याएको थियो ।