थप सतर्क बनौं,कोरोनाको नयाँ भेरियन्ट निकै खतरनाक प्रमाणित (भिडियो सहित)

इपिडिमियोलोजी तथा रोग नियन्त्रण महाशाखाले कोभिड–१९ को तेस्रो भेरियन्ट निकै संक्रामक रहेको बताएको छ ।

महाशाखा प्रमुख डा.कृष्ण पौडेलले शुरुमा बेलायतमा पत्ता लागेकोभन्दा यो भेरियन्ट ४० देखि ५० प्रतिशत बढी संक्रामक रहेको जानकारी दिनुभएको छ । यो भेरियन्टको २० देखि ४४ वर्ष उमेर समूहमा उच्चसंक्रमण रहेको पनि उहाँले जानकारी दिनुभयो ।

उहाँले भन्नुभयो– ‘प्रारम्भिक अध्ययनहरुले यसको संक्रमण हुने दर अन्य भेरियन्टभन्दा उच्च रहेको देखिएको थियो । नेपाल र भारतमा बढेको दरलाई हेर्दा पनि यो अलि बढी संक्रामक छ भनेर भन्न सकिन्छ । केही अध्ययनअनुसार,बेलायतमा पत्ता लागेको भेरियन्टभन्दा यो भेरियन्ट ४० देखि ५० प्रतिशत बढी संक्रामक रहेको आँकलन गरिएको छ ।

उमेर समूह हेर्ने हो भने २० देखि ४४ वर्ष समूहमा उच्च संक्रमण दर देखिन्छ । तर अरु उमेर समूलाई पनि यसले छोड्दैन भन्ने अप्रत्यक्ष रुपमा पुष्टि भएको छ ।’

डा.पौडेलले हाल लगाइएको कोभिड विरुद्धको कोभिसिल्ड खोपले तुलनात्मक रुपमा उक्त भेरियन्टको संक्रमण र त्यसको जटिलतालाई कम गर्न साथै मृत्युदर कम गराउन प्रभावकारी हुने बताउनुभयो ।

उहाँले सामाजिक दूरी कायम गर्ने, मास्कको प्रयोग गर्ने तथा सरसफाईलगायतका जनस्वास्थ्यको मापदण्ड पालना गरेमा मात्रै कोभिड १९ को तेस्रो भेरियन्टबाट बच्न सकिने बताउँदै जनस्वास्थ्यका मापदण्ड कडाइकासाथ पालना गर्न आग्रह गर्नुभएको छ ।