अध्यादेशप्रति एमाले किसानका अध्यक्षको असहमति

सरकारले हालै ल्याएको राजनीतिक दलसम्बन्धी अध्यादेशको बिरोध सुरु भएको छ । सत्तारुढ दल काँग्रेसभित्रैबाट अध्यादेशको विरोधको आवाज निस्कँदै छ । यता सो अध्यादेशको विरोधमा एमाले अध्यक्ष केपी ओलीनिकट अखिल नेपाल किसान महासंघले आन्दोलनमा उत्रिने जनाएको छ ।

डा.प्रेम दङ्गालले दल विभाजनसम्बन्धी अध्यादेश खारेजीको माग गर्दै,अध्यादेश फिर्ता नलिए आन्दोलनमा उत्रन आह्वान समेत गरेको छ । विज्ञप्तिमा भनिएको छ,‘संसद बैठक चलिरहेकै बेला सरकारले संसदलाई कुनै बिजनेश समेत नदिई अन्त्य गरेको र त्यसको भोलिपल्टै राजनीतिक दल विभाजनसम्बन्धी अध्यादेश ल्याउने कार्य खेदजनक र निन्दनीय छ ।’

यसअघि ओली प्रधानमन्त्री हुँदा यस्तै अध्यादेश ल्याइएको थियो । पोहोर बैशाखमा दल विभाजनसम्बन्धी अध्यादेश ल्याउँदा पार्टीको केन्द्रीय समिति र संसदीय दलमा ४० प्रतिशतको संख्या घटाएर “र” लाई “वा” बनाइएको थियो ।अहिले भने प्रधानमन्त्रीले आफ्नो नेतृत्वको सरकारलाई टिकाई राख्नका लागि थोरै केन्द्रीय सदस्य वा सांसद भए पनि पुग्ने गरी अध्यादेश ल्याउने काम गरेको महासंघले आरोप समेत लगाएको छ ।

केही राजनीतिक दल र तिनका केही नेताको कुण्ठा, पदलोलुपता र महत्वाकांक्षा पूरा गर्न सहयोग पुग्ने गरी र ती दललाई विभाजन गराई आफ्नो सत्ता टिकाउने दुराशयपूर्ण मनसायबाट ल्याइएको अध्यादेशले लोकतान्त्रिक मूल्य मान्यताको घोर उपहास गरेको महासंघको ठहर छ । उसले भनेको छ, ‘यसले लोकतान्त्रिक प्रणालीलाई चरम विकृत बनाएर देशलाई पुनः राजनीतिक अस्थिरतातर्फ धकेलेको छ ।’