पदाधिकारी टुंगो लागेन, बूढानिलकण्ठबाट त्यसै उठे नेताहरु

पर्सिदेखि शुरु हुने पार्टीको १४ औँ महाधिवेशनमा पदाधिकारीको उम्मेदवार टुङ्गो लगाउन बसेको काँग्रेस संस्थापन पक्षको बैठक बिना निष्कर्ष टुंगिएको छ । प्रधानमन्त्रीसमेत रहनुभएका सभापति शेरबहादुर देउवाको निजी निवास बूढानिलकण्ठमा बसेको बैठक थप गृहकार्य गरेर भोलि पदाधिकारी र केन्द्रीय सदस्यहरुको नाम टुंग्याउने गरी उठेको हो ।

बैठकमा सहभागी केन्द्रीय सदस्य महालक्ष्मी उपाध्याय “डिना”का अनुसार नेताहरुले आफ्नो उम्मेदवारीका बारेमा बैठकमा प्रष्ट धारणा राखेका थिए । आकांक्षी धेरै भएकाले थप छलफलका लागि आज निर्णय नगरिएको उहाँको भनाइ छ । ‘सबैले आ-आफ्ना आकांक्षा राख्नुभयो । सभापतिज्यूले सबैका कुरा सुन्नुभएको छ । अब भोलि फेरि बसेर निर्णय गर्ने हुन्छ’, उहाँले भन्नुभयो ।

‘केन्द्रीय सदस्यमा मेरो उम्मेद्वारी रहँदैन भनेर मैले बैठकमै भनेको छु’, जनआस्थासँगको कुराकानीमा उहाँले भन्नुभयो, ‘१५ वर्ष (तीन कार्यकाल) केन्द्रीय सदस्य भैसकेँ त्यसैले म स्वभाविक रुपमा पदाधिकारीको दावेदार हो ।’

बैठकमा सभापतिबाहेकका पदमा नेताहरुले आ-आफ्ना दावी पेश गरेका थिए । बताइएअनुसार उपसभापतिमा विजय गच्छेदारले आकांक्षा राखेका थिए । त्यस्तै, महामन्त्रीमा विश्वप्रकाश शर्मा र प्रकाशशरण महतको दावी छ । विभिन्न क्लस्टर छुट्याइएको सहमहामन्त्रीमा सोहीअनुसार नेताहरुले आफ्ना दावी राखेका थिए।

सहमहामन्त्री महिलामा डिना,पार्वता डिसी र अम्बिका बस्नेत,दलितमा मानबहादुर विश्वकर्मा र मुस्लिममा अतहर कमाल मुसलमान र फरमुल्लाह मन्सुरले मुसलमान दाबी गरेको बताइएको छ । त्यस्तै थारु कोटाबाट रामजनम चौधरी, खस/आर्यमा सुनिल थापा र मधेसीमा महेन्द्र यादवले सहमहामन्त्रीमा दाबी पेश गरेका थिए ।

महिलाबाट सहमहामन्त्रीको दावेदार उपाध्यायले पदाधिकारीबाहेक अरु पदमा उम्मेदवारी नदिने घोषणा नै गर्नुभएको छ । आफू पदाधिकारीको बलियो दावेदार रहेको भन्दै उहाँले पुन: केन्द्रीय सदस्यको उम्मेदवार नबन्ने प्रष्ट पार्नुभयो । ‘केन्द्रीय सदस्यमा मेरो उम्मेद्वारी रहँदैन भनेर मैले बैठकमै भनेको छु’, जनआस्थासँगको कुराकानीमा उहाँले भन्नुभयो, ‘१५ वर्ष (तीन कार्यकाल) केन्द्रीय सदस्य भैसकेँ त्यसैले म स्वभाविक रुपमा पदाधिकारीको दावेदार हो ।’

संस्थापनपक्षीय बैठकले केन्द्रीय सदस्यहरुको उम्मेदवार तय गर्नका लागि प्रदेशमा छलफल गर्न नेताहरुको जिम्मेवारी पनि तोकेको छ । जसअनुसार प्रदेश १ बाट ज्ञानेन्द्र कार्की, प्रदेश २ बाट महेन्द्र यादव र रमेश रिजाल, बागमती प्रदेशमा प्रकाशशरण महत, गण्डकी प्रदेशमा गोपालमान श्रेष्ठ, लुम्बिनी प्रदेशमा बालकृष्ण खाँण, कर्णाली प्रदेशमा पूर्णबहादुर खड्का र जीवनबहादुर शाही र सुदूरपश्चिम प्रदेशमा एनपी साउद र रमेश लेखकलाई जिम्मेवारी दिइएको छ ।

नेतृ उपाध्यायका अनुसार सम्बन्धित प्रदेशका केन्द्रीय सदस्यहरुको बैठक बसेर केन्द्रीय सदस्यका आकांक्षीहरुको नाम छनोट गर्ने गरि जिम्मेद्वारी तोकिएको हो ।